Тус хэмжээ ябуулгада тойрогой эрхим хүнүүд, хүтэлбэрилэгшэд, ажаhуугшад олоор хабаадаа. Соёлой байшанай артистнарай гүйсэдхэлгэ доро Агын Буряадай тойрогой түрын дуулал зэдэлнэ. Yглөөнhөө шангахан наратай байhан аад, үдэдэ бүрхөөд хүйтэрбэшье, дээрэ бодхоогдоhон, хоорондоо тон дулааханаар нягта холбоотой гурбан туг ехэл номгоноор намилзан, ажалша бүхэриг арад зондоо амар мэндые хүргэжэ байhандал үзэгдэнэ. Агуу совет арадуудай хани барисаа бэхижүүлхэ хэрэгтэ ба соёлой болон ажахын хүгжэлтэдэ хубитаяа оруулһанай түлөө, СССР-эй 50 жэлээр дашарамдуулан, СССР-эй Верховно Зүблэлэй Президиумэй 1972 оной декабриин 29-эй Зарлигаар Шэтын можын Агын Буряадай үндэhэтэнэй тойрог Арадуудай Хани барисаанай орденоор шагнагдаhан юм. Мүн лэ СССР-эй Верховно Зүблэлэй Президиумэй 1977 оной августын 3-ай Зарлигаар тойрогой хүдэлмэрилэгшэдэй ажахын ба соёлой барилгада амжалта туйлаhанай түлөө Агын Буряадай үндэhэтэнэй тойрог Ажалай Улаан Тугай орденоор шагнагдаhан. Омог дорюунаар зогсоhон улаан шулуун хүшөөдэ дүмүүхэнээр тодхогдоhон шудхамал хүрэл орденууднай дабшалта түгэс арадтаа даган баясана. Тойрогоймнай түүхын хуудаhанууд ирагдаhаар, агаарай долгёор тунан ошоно, энэ үдэр сэрэгшэ баатар хүбүүднай, ажалша малша зомнай дурсан hанагдаа.

You have no rights to post comments