Энэ удаа «Мир буддийской культуры» гэһэн уласхоорондын хуралдаан үргэн дэлисэтэйгээр Ага тосхондо эмхидхэгдээ. Агын дасанай 215 жэлэй ойн баярай хэмжээндэ сентябриин 28-29-дэ суртаал номой гүн ухаа шудалһан мэдээжэ багша, дасанай жаяг ёһо байгуулһан Лубсан-Доржи Данжиновай (1826-1899) түрэһөөр 200 жэлдэ зорюулагдаһан зүблөөн болоо һэн. Эндэ Хитад, Монгол, Росси гүрэнүүдэй лама санаартан, эрдэмтэд, багшанар, буддын шажан шэнжэлэгшэд, оюутад гэхэ мэтэ суглараа.
Агын дасанай 215 жэлэй ойн баярай хэмжээндэ Лубсан-Доржи Данжиновай түрэһөөр 200 жэлэй ойдо зорюулагдаһан баяр ёһололой эхиндэ «Агын дасанай магтаал» зэдэлээ. Энэ магтаалай үгын ба хүгжэмэй авторнууд – Үбэр Байгалай хизаарай соёлой габьяата хүдэлмэрилэгшэ Долгорма Мункуева ба Агын Буряадай автономито тойрогой соёлой габьяата хүдэлмэрилэгшэ Константин Митупов. Агын дасан 215 жэлэй туршада элдэб баршад тодхорто дайрагдаашье һаа, дабшалта абажа хүгжэһөөр зандаа юм. Ямаршье үедэ Будда багшын суртаал номдо үнэн сэхээр һураһан, дасанайнгаа нэрэ соло дээшэнь үргэжэ ябаһан лама санаартанай хэһэн ажал аргагүй ехэ юм. Магтаалай үгэнүүд соо эдэ бүгэдэ эли тодоор харагдана. Хоёр үдэрэй туршада үнгэргэгдэһэн хуралдаан магтаалай удха түгэлдэрые үргэдхэн элирүүлээ.
Нангин багшын дурасхаалда
- Информация о материале
- Автор: Валентина ЦЫРЕНЖАПОВА.
- Категория: Дурасхаал
- Просмотров: 46
