Минии аба, Бадмын Сэдэб, дайнай ветеран, нютагаа бусаһаар, олон жэл түрэлгын хони хараһан, жэлһээ жэлдэ түсэбѳѳ үлүүлэн дүүргэдэг байһан юм.

Тудхалтын һургуулида. Наада таладань - пионервожата Чимитжаб Бабуева. Сахюуртын һургуулиин музейдэ Валерий Цыцыковэй бэлэглэһэн фото-зураг.
Манай колхозой түрүүлэгшээр 1954-1962 онуудта Цыдендоржо Балданович Цыцыков оролдосотой бэрхээр хүдэлһэн юм. Ѳѳрѳѳ балшар бага наһанһаа хара ажал хэжэ эхилһэн, хүдѳѳ ажахые һайн мэдэхэ, шадабаритайгаар ударидажа, колхозоо зүгѳѳргүй дээшэнь бодхооһон. Гушан гурбан партизануудай нэрэмжэтэ колхозтой ниилэһэн, олон зотой, малаар баян, газар ехэтэй, ехэ талмайда талха таряа таридаг “Баян Ворошилов” гүүлэжэ ябаһан колхоз юм.
Аба хүндэ үбшэндэ дайрагдажа, хусашан болоһон. Алхана нютагта нэгэ наридаһан хүн доргоной тоһо уужа, һайн болоо гэжэ суу тараһан байгаа. Колхозой түрүүлэгшэ зоноо суглуулжа, Нуурта ба Тудхалтаар дорго бэдэрэе гэжэ шиидхэбэри гаргаһан. Баруун Хуурайн һаалиин үхэршэн Доржын Дондок аха хаана доргон байхаб гэжэ хэлэжэ үгэбэ. Олонхинь хазаар моритой, ябаганшье, машинада һууһаншье хүнүүд Нуурта хүндые бүһэлжэ, зүг бүхэн тээһээнь горхон руугаа дүтэлжэ, удаан сагай турша соо нэгэ дорго барижа асарһан юм.
Манай гэр бүлэдэ болоһон нэгэ жэшээ бэшэбэ гээшэ аабзаб даа. Энэ мэтэшэлэн Цыдендоржо түрүүлэгшэ хүн зоноо гамнадаг, хайрладаг, зонойнгоо тала харадаг, ажалшадаа нютагай болон холыншье аршаан курортнуудаар ябуулдаг байһан гээшэ. 1956 оной хабар абые Москва хото ВДНХ-да эльгээһэн. ВДНХ тушаа бэшэгдэһэн номыень би мүнѳѳ хүрэтэр гамтайханаар абажа ябадагби, наһа барахынгаа урда тээ абамни томо город хаража ерэһэн гээшэ ха даа гэжэ һанан һанан, нулимсаа дуһалуулан байдагби...
Цыдендоржо Цыцыков Чимитжаб нүхэртэеэ олон хүүгэдые үндылгэжэ, гарыень ганзагада, хүлыень дүрѳѳдэ хүргэһэн юм. Чимитжаб Бабуевна эхин шатын һургуулиин багшаар хүдэлһэн.
Дэлгэрэнгыгээр 29-дэхи дугаарта.
