«Театрай намарай» хаһа нээлгэдэ Даширабдан Батожабайн басаган Сэсэгма Батожабай, Агын Буряадай тойрогой Захиргаанай үндэһэн соёл хүгжөөлгын таһагай дарга Хандама Цыденова, Могойтын аймагай захиргаанай эмхидхэлэй ба кадрова ажалай хүтэлбэриин дарга Оюна Цыбикжапова гэгшэд тайзан дээрэ уригдаа. «Агын талаһаа урган гараһан, нютагаа суурхуулһан үзүүр хүбүүд олон юм. Тэдэнэйнгээ нэрэ хүндые мүнхэлжэ, Агын буряадууд мүрысөөнүүдые эмхидхэдэг гээшэ. Жэшээлбэл, 2023 ондо Советскэ Союзай Баатар Базар Ринчинодо зорюулагдаһан дүрэ буляалдаата барилдаагаар мүрысөөн 60-дахяа үнгэргэгдөө, СССР-эй арадай артист Лхасаран Линховоиндо зорюулагдаһан дуушадай мүрысөөн 14-дэхеэ эмхидхэгдэхэнь гэхэ мэтээр нютаг ороноо суурхуулһан зондоо баяртайбди», - гэжэ Хандама Абидуевна тэмдэглээ. Үгэ хэлэгшэд хабаадахаяа ерээд байһан бүлгэмүүдтэ амжалта хүсөө.
Жюриин түрүүлэгшээр Хандама Цыденова, шүүгшээр Г-Д.Дашипыловай нэрэмжэтэ Ивалгын хүүгэдэй уран урлалай һургуулиин хүгжэмэй багша Сэсэгма Батожабай, Х.Намсараевай нэрэмжэтэ Буряадай гүрэнэй драмын академическэ театрай музей даагша, культурологиин эрдэмүүдэй кандидат, Буряад Уласай ба Россиин Федерациин соёлой габьяата хүдэлмэрилэгшэ Валентина Бабуева, Буряад Уласай ба Россиин Федерациин габьяата артистка, Агын Буряадай автономито тойрогой соёлой габьяата хүдэлмэрилэгшэ, Х.Намсараевай нэрэмжэтэ Буряадай гүрэнэй драмын академическэ театрай актриса Должин Тангатова ба секретаряар Үбэр Байгалай хизаараар буряад соёл хүгжөөлгын түбэй методист Баирма Соктоева гэгшэд ажаллаа.
Мүрысөө Үбэр Байгалай хизаарай буряад соёл хүгжөөлгын түбэй мэргэжэлтэд хүтэлэн ябуулаа. Энэ удаа 8 арадай театрай ба 6 драматическа бүлгэмэй артистнар харагшадые зүжэг наадаараа хужарлуулба.
Валентина ЦЫРЕНЖАПОВА.
