Гүрэн бүхэндэ зоной ажабайдал элдэбын. Гүрэнэй өөрын шиидхээгүй асуудалнуудшье байха. Хүгжэнги һайн ажабайдалтай болоһоншье гүрэнүүд бии. Жэшээлбэл, Хитад гүрэнэй ажабайдал һайжараа гэжэ тэмдэглэхээр. Тэрэ гүрэнэй экономико хүгжэнги. Хүдөөгэй харгынуудынь асфальтаар хушагдаатай. Харгын асуудал эндэ үгы болоһон гэжэ ойлгохоор. Гадна Түбэдэй хада уулаар нэмжыһэн дасан дуганууд хүрэтэр харгы жэгдэ асфальтаар хушагданхай байгаа һэн.
   Мүнөө Түбэд Хитад гүрэнэй мэдэлдэ оронхой. Эрхэ сүлөөгөө алдаһан түбэдүүд ёһо заншалаа, үндэһэн хубсаһаяа, хэлэеэ алдахагүй гэжэ горитойхон ажал ябуулна. Түбэд яһатанай нэгэнби гэжэ мэдэржэ байдаг хүн бүхэниинь үндэһэн хубсаһаяа үмдэхые оролдодог. Тэдэнэй үндэһэн хубсаһан хэдэн янзын байдаг. Түбэдэй хото городуудаар үндэһэн хубсаһа наймаалдаг наймаа, дэлгүүрнүүд олон юм. Энэ мэтээр Монголоор бодоходо, баһал омогорхохоор. Улаан-Баатарай дэлгүүрнүүдтэ үндэһэн хубсаһа худалдадаг газарнууд олон байна. Энэдхэгтэшье ябахада, индус яһатанай эхэнэрнүүд, баян, үгытэйшье байг, сари хубсаһаяа үмдэнхэй ябана һэн.
   Яһатан бүхэн өөр өөрын онсо хубсаһатай. Хубсаһаараа бэшэ арадһаа бидэ илгарнабди. Энэ болотор дамжан ерэһэн буряад хубсаһаяа ганса һайндэрнүүдтэ бэшэ, харин юрын үдэрнүүдтэ үмдэхэдэ болохо гэжэ ойлгохонь шухала. Буряад маягта оруулагдаһан элдэб хубсаһануудые һанажа, олоор оёжо, дэлгүүртэ худалдадаг болоо һаань, гоёл байха һэн. Жэшээлбэл, би нэгэ тэрлигтэй болоод, тэрэнээ үмдэхэ газараа олодоггүйб. Тэрлигээ ханза соогоо таһа даранхай, хэдэн жэлээр байлгадагби. Энэ буруул даа. Шэнэхээнһээ ерэһэн айлшадые адаглахада, тэдэ энгэртэй буряад хубсаһаяа хаанашье үмдөөд ябадаг. Эдэ досооһоо буряадайнгаа шэнжэ алдаагүй зон болоно. Энээн тухай хүн бүхэн бодомжолжо, хубсаһаяа үмдөөгүй һаамнай, үндэһэн заншалнай хэндэшье хэрэггүй болохол.

You have no rights to post comments