«Энергожилстрой» гэһэн барилгын эмхи һургуули бодхооно. Тус эмхиин захирал Виктор Лопатинай хэлэһээр, һургуулиин барилга 75 хубяар түгэсөөд байна. Мүнөөдэрэй байдалаар, 135 ажалшад үглөөнһөө үдэшэ болотор байшанай досоо ба газаа талануудыень шэрдэлгын хүдэлмэринүүдые ябуулна. Хажуугаарнь һуралсалай таһалгануудые эд бараагаар, хэрэгсэлнүүдээр хангаха ажал хэгдэнэ. Байшанай газаагуур, тамирай талмайнуудые, амаралгын газарнуудые болбосон түхэлтэй болгохо хүдэлмэринүүд хүлеэнэ.
Һургуулиин захирал Гэрэлма Бадмаевагай мэдүүлһээр, хүдэлхэ багшанар элирэнхэй. Гадна хими ба биологиин багшанар дуталдана. Һургуулида «Атомна ангинууд» гэһэн гүрэнэй түлэблэл байгуулжа, физикэ, тоо бодолго, хими ба биологиин талаар гүнзэгыгөөр шэнжэлэлгын ажал ябуулха. Тиихэдэ тосхоной табадахи һургуулида гэрэй ажал хэхэ шадабариин,тогоошоной, түмэршэ дарханай мэргэжэлнүүдээр тусхай хэшээлнүүд ябуулагдадаг байха юм.
Удаань Баир Баясхаланович түрүүтэй бүлэг зон һургуулиин дэбисхэр дээрэ баригдажа байһан объектнүүдые хараа. Байшан соо уужам томо тамирай, хатарай танхимууд бии. Эдеэ хоол баридаг газарынь 350 һууритай. Һургуулиин байшан түлэблэлэй ёһоор 560 һууритай. Мүнөө хабарһаа һураха дуратай хүүгэд бүридхэгдэжэ эхилэнхэй. Оршон сагта 200 гаран үхибүүдэй гэртэхин мэдүүлгэ бэшээд байна. Хүдөө нютагуудта, хото городуудта, Ага тосхоной бэшэ һургуулинуудта һурадаг, «Западный» хотондо ажаһуудаг үхибүүдэй гэртэхин мэдүүлгэ оруулна. Һуралсалай гуламтын дэбисхэртэ футбол наадаха, хүүгэдэй бэеэ һорихо талмайнууд бэлдэгдэнэ. Табадахи һургуули өөрын модульно котельнитэй юм. Үнгэрэгшэ үбэл котельни ашаглагдажа, дулаан байшан соо барилгын хүдэлмэринүүд ябуулагдаа. Тиигэжэ тосхоной шэнэ һургуули ерэхэ һуралсалай хаһада үхибүүдые угтан абахаар бэлэн болохо бшуу.
Агада шэнэ һургуули нээгдэхэнь
- Информация о материале
- Автор: Эрдэни ЧИМИТДОРЖИЕВ.
- Категория: Рубрика
- Просмотров: 118
