Нэгэдэхи станцида – Агын аймагай соёлой байшан соо «Буряад арадай нааданууд» гэһэн сэдэбтэй даабарида һурагшад оньһон үгэнүүдые хэлсээ, таабаринуудые таалсаа, үгэнүүдые ород хэлэнһээ буряадта оршуулаа. Мүн гунгарбаа соо сүгсэнүүдые ёһо соонь табиха, 12 жэл һубарюулан нэрлэхэ, арадай наадануудые мэдэхэ гэһэн даабаринуудые дүүргэһэн байна. Буряад дэгэл, гоёолтонууд тухай соёлой байшанай хүдэлмэрилэгшэ Дулма Мункуева хөөрөө.
Хоёрдохи станцида – буряад хэлэнэй багшанарай эблэл «Бабжа-Барас баатар – арадай баатар» гэһэн сэдэбээр асуудалнуудые бэлдээ. Гурбадахи станцида – Үбэр Байгалай хизаарай Гүрэнэй архивай Ага тосхоной филиалай ажалтад Агын буряадуудай түүхэ бэшэг болон угай бэшэгүүд тухай хүүгэдэй мэдэсэ гүнзэгырүүлээ. Дүрбэдэхи станцида – Г.Цыбиковэй нэрэмжэтэ Агын үндэһэтэнэй музей соо «ХХ зуун жэлэй эхинэй Ага нютагай мэдээжэ хүнүүд» гэһэн сэдэбээр үхибүүд асуудалнуудта харюусажа, ехэ юумэ мэдэхэ болоо юм. Табадахи станцида – Үбэр Байгалай хизаарай буряад соёл хүгжөөлгын түбэй бэлдэһэн Агын Буряадай тойрогой түүхэ тухай асуудалнууд һурагшадай һонирхол татаба. Зургаадахи станцида – Владимир Чимитдоржиевай нэрэмжэтэ Агын эмнэлгын колледждо «Бэеын энхэ элүүрые сахиха арганууд» гэһэн сэдэбээр үхибүүд өөһэдтөө туһатай мэдээ абаа. Долоодохи станцида – Агын прокуратурада «Ажаһуугшадай мэдэхэ эрхэнүүд болон харюусалга» гэһэн сэдэбээр асуудалнууд бэлдэгдэжэ, үхибүүд һайнаар харюусаһан байна. Наймадахи станцида – Үбэр Байгалай хизаараар Россиин социальна жасын таһагта «Олоной харилсаанда хабаатай асуудалнууд» гэһэн сэдэб дурадхагдаа, эндэ үхибүүд эдэбхитэй хабаадаба. Удаадахи станцида – Бадма-Базар Намсараевай нэрэмжэтэ Агын аймагай номой санда «Арадай аман зохёолой абдарһаа» гэһэн ехэ һонирхолтой даабари үгтэжэ, үхибүүд аман зохёол тухай мэдэсэеэ үргэдхөө.
«Түрэлхи хэлэмнай – угаймнай захяа»
- Информация о материале
- Автор: Гэрэлма БОРОЕВА.
- Категория: Рубрика
- Просмотров: 133
