Г.Цыбиковэй нэрэмжэтэ Агын үндэhэтэнэй музей соо Батожаб Базаржаповай «Пейзажи родной земли» гэhэн үзэсхэлэн дэлгээгдэhэн тухай уридшалан хуряангыгаар мэдээсэhэн байнабди. Тиибэшье энэ хүнэй ажабайдалаар hонирхожо, дэлгэрэнгыгээр бэшэхэ дуран хүрөө. Уран зурааша, уран зохёолшо, аяншалагша Николай Рерих «Зурадаг хүн оршон тойронхиёо дурлаhан сэлмэг нюдөөр, этигэл дүүрэн сэдьхэлээр ажаглажа, байгаалиин тогтууригүй hэлгээниие зурагтаа онсолон харуулжа шадаха ёhотой. Тиигэбэл зураашын зураг «ами оруулһан» мэтэ шухагаар үзэгдэдэг» гээд хэлэhэн байдаг. Энэнь тон зүб. Алтан шара намарай хаhа, жабартайхан үбэлэй саг, ааяма халуун зунай үе, янгинама үбэлэй сэбдэг хүйтэнэй hүүлээр «ами» абажа hэргэдэг хабарай оршон зураглаhан зурагууд соонь уран зураашын сэдьхэлэй баялиг, нютаг орондоо хэды шэнээн дуратай байhаниинь харагдана.

You have no rights to post comments