Ушар юуб гэхэдэ, Сагаалганай найр нааданай хэмжээндэ гэр бүлэнэрэй хоорондо «Буузын үдэр» гэһэн мүрысөөн үнгэргэгдөө. Агын Буряадай тойрогой Захиргаанай социальна хүгжэлтын таһагай хүтэлэгшэ мэргэжэлтэн Ринчин Гармажаповай үүсхэһэн, «Молодёжь Аги» эмхиин эмхидхэһэн энэ мүрысөөндэ 15 мэдүүлгэ орожо, Ага тосхоной, Агын, Дулдаргын, Могойтын, Шэтын, Забайкальскын, Бооржын, Харымай, Петровск-Забайкальскын муниципальна тойрогуудай, «Горный» ЗАТО-гой бүлэнэр 12 хүрэтэр наһатай 1-1 үхибүүнтэеэ хабаадаба. Шүүгшээр «Бууза», «Туяа» кафенүүдэй, «Дангина» банкетнэ танхимай хүтэлбэрилэгшэд Бальжит Доржиева, Бэлигма Брюханова, Цыцык Мункуева гэгшэд ажаллаа.
Түрүүшын «Самый быстрый лепщик бууз» янзада эжынэр үхибүүнтэеэ стол дээрэ бэлэн байһан талха, фарш, шабдаа, ганжан хэрэглэжэ, 5 минутын туршада олон бууза хумиха ёһотой байгаа. Тэдэнэй түлөө һанаагаа зобоһон хүнүүдэй дундаһаа ямар һонин мүрысөөн гээшэб гэлдэхэ зон олдоо. Табан минутын удаа шүүгшэд хэды бууза хэр зүбөөр бэлдээб гэжэ тэмдэглэжэ абаа. Тиин энэ шатада Ага тосхоной 17 бууза хумиһан Сокто ба Оюна Жаргаловтанай бүлэ оройлһон байна. Могойтын тойрогой Цыдып ба Цыремжит Даширабдановтанай (16 бууза), Забайкальскын тойрогой Андрей ба Соёлма Алексеевтэнэй (14 бууза) бүлэнэр 2-дохи ба 3-дахи һууринуудые эзэлээ. Бултандань дипломууд барюулагдаа юм.
Удаань эжынэр ба үхибүү-дэйнь бэлдэһэн буузануудые эдилгээр «Самый скоростной папа» гэһэн янзаар мүрысөөн үргэлжэлбэ. Түрүүшын шатада бүлэнэрэй түрүүшүүл тон богони саг соо 8 бууза эдихэ ёһотой байбад. Дүримэй ёһоор, 6 эрхим абанар хахад финалда хабаадаха эрхэдэ хүртэжэ, үшөө 5 бууза бараха ёһотой байгаа. Һүүлэй һүүлдэ дүн хамта 13 бууза «багтаажа» шадаһан 4 эрхимүүд – тус тустаа 1,15 ба 1,20 секунда харуулһан Бооржын тойрогой Борис Дамдинов, Ага тосхоной Сокто Жаргалов, мүн адли саг – 1,27 секунда харуулһан Могойтын тойрогой Эрдэм Дашиев ба Дулдаргын тойрогой Алексей Рабжинов гэгшэд тодоржо, финалда гараба. Харин 2,04 саг харуулһан абанар – «Горный» ЗАТО-гой Максим Потехин ба Могойтын тойрогой Цыдып Даширабданов шүүгдэжэ, саашаа хабаадаха эрхэгүй болоо. Талаан тудаһан финалистнуудта үшөө 10 бууза барахань хүндэ боложо, наһанайнь хани нүхэд хамһалсаа. Тиигэжэ Сокто ба Оюна Жаргаловтанай бүлэ илаба. Тэдэнэй дүн – тон богони 1,46 саг. Удаадахи һууринуудые Борис, Дарима Дамдиновтан (2,07 секунда) болон Эрдэм, Бальжина Дашиевтан (02,35 секунда) эзэлһэн байна. Эдэ бүлэнэртэ баһал дипломууд барюулагдаа.
Жаргаловтанай эбтэй бүлэ эрхимлэбэ
- Информация о материале
- Автор: Долгор РАДНАБАЗАРОВА.
- Категория: Рубрика
- Просмотров: 56
