Бэрхэ, шанга, тамирша г.м. үгэнүүд Улзыта ба Лхама-Цырен Цырендашиевтанай гэр бүлэдэ тон тааруу гэхэдэ, буруу бэшэ. Тэдэ 2023 ондо үнгэргэгдэһэн олон хүүгэдтэй бүлэнэрэй «Мы вместе!» гэһэн форумой «Спортивная семья» янзада 2-дохи һуури эзэлһэн байна.
Улзыта Баировичай тамирта дуратай байһаниинь гайхалгүй. Юундэб гэхэдэ, тэрэнэй аба Баир Цырендашиев тамирша ябаһан. Тэрэ ута зайда гүйдэг, санаар ябадаг байһан юм. Мүн лэ тэрэнэй хүгшэн аба Цырендаши Цыденжапов хүнгэн атлетикээр бэеэ һоридог, можын мүрысөөнүүдтэ эдэбхитэй хабаадажа, шангуудта хүртэдэг байһан ха. Лхама-Цырен Дамбаевнагай аба Дамба Цынгуевич баһал тамирта дуратай. Тэрэ һургуулиин наһанһаа хүнгэн атлетикээр, санаар урилдалгаар бэеэ һорижо, аймагай болон можын мүрысөөнүүдтэ хабаададаг байһан. Дамба Цынгуевич мүнөөшье үбэлдөө санаар гүйдэг, елүүр хээд, конькигаар һолжордог.
Гэрэй эзэн Улзыта Цырендашиев Шулуутайда 1986 ондо Баир Цыденжаповичай ба Цымпилма Аюшеевнагай гэр бүлэдэ түрэһэн. Тэрэ һургуулиин үеһөө хүнгэн атлетикээр бэеэ һорижо, аймагай, тойрогой, Шэтын можын мүрысөөнүүдэй оло дахин абарга болоһон. 2003 ондо Красноярск хотодо һургуулиин хүүгэдэй хоорондо үнгэргэгдэһэн Зүүн зүгэй болон Сибириин I спартакидын хабаадагша. Улзыта Баирович нютагайнгаа дунда һургуули дүүргээд, Агын багшанарай колледждо һурахаяа ороһон. Һүүлээрнь Буряадай гүрэнэй дээдэ һургуулида һуража, физкультурын багшын мэргэжэлтэй болоо. Мүнөө хизаарай реабилитационно түбтэ инструктор-методистаар хүдэлдэг.
(Үргэлжэлэлынь 5-дахи дугаарта уншахада болохо).
Оюна ШАГЖАЕВА.
