Хальбан угтай, хуасай угай нагасатай Пурэвдорж аха Хэнтэйн аймагай Дадал һомондо түрэһэн. Тэрэнэй элинсэг хулинсаг Энгидэй, Хёлго мүрэнүүдэй эрьедэ ажаһууһан юм. «Нагаса абамни 1919 ондо Монгол зөөжэ ошоһон. Эндэһээ ошоходоо, Буурайтан гэжэ нэрэтэй байһан», - гэжэ Пурэвдорж аха хөөрэнэ. 

   Тэрэ мүнөө Улаан-Баатарта ажаһуудаг, буряад соёл хүгжөөхэ талаар буряадуудай нэгэдэлэй мэргэжэлтэн. Хүгшэдэйнгөө бууса эзэгүй байлгахагүйн тула Дадал һомондоо нэгэ хэды мал барижа, нютагаа ерэн ошон байдаг юм. 

   Пурэвдорж аха 1990-ээд онуудһаа Ага ерэжэ, түрэлөө бэдэржэ эхилһэн. «Алтаргана» нааданда ерэхэдээ, түрэлөө төөриһэн буряадуудые нэгэдүүлхэ гэжэ Агын музей, архивһаа угай бэшэг буулгажа бэшээ. Энэ ажал ябуулһанайнь һайгаар нэгэ хэды хүн түрэлөө олоһон байна. Шэнэхээн таһаржа ошоһон буряадуудые уулзуулха, танилсуулха гэжэ оролдодог. «Хэн нэгэндэ нэмэритэй, туһатай ябаха хэрэгтэй гэжэ һанадагби. Хүгшэднишье тиигэжэ хэлэдэг байһан», - гэжэ Пурэвдорж аха тэмдэглэнэ. 

Сэ Пурэвдорж. Гэр бүлын архивай фото-зурагууд. 

 

   Мүнөөшье эдэ дуушад элинсэгэйнгээ нютаг хараха, түрэлхидтэеэ уулзажа танилсаха зорилтойгоор Ага ерээ юм. 

   «Сагаалганай һүүлээр энэ концерт-наадаяа Монголдоо харуулха түсэбтэй байнабди. Удаань Шэнэхээн ошожо, дуушадаа тэндэ ажаһуудаг буряадуудтай танилсуулха хүсэлтэйб. Мүн лэ эдэ дуушадай буряад заншалта хубсаһаа үмдөөд, арадайнгаа дуу дуулажа ябаагүй һаань, ондоо хүн элдэбээр, буруу дуулаха. Жэшээлбэл, Халхада нэгэ дууша басаган буряадаймнай «Холо байна» гэһэн дуунай үгэнүүдые буруу болгоод дуулаа һэн. Бидэнэй арадайнгаа дуунуудые зүб дуулаагүй һаамнай, ондоо яһатан дуунуудыемнай дуулажа, бэшэнтэй буруу танилсуулха байна. Гадна наһатай зон арадайнгаа дуу шагнахадаа хүхилдэхэ, залуушуул дуулажа һураха», - гэжэ концерт эмхидхэгшэ хөөрэнэ. 

   (Үргэлжэлэлынь 6-дахи дугаарта уншахада болохо).

   Оюна ШАГЖАЕВА.

 

You have no rights to post comments