Владимир Жалсараевые Үбэр Байгалай хизаарта, илангаяа Буряад Уласта мэдэхэ зон үсөөн бэшэ гэхэдэ алдуугүй. Хүршэ хоёр нютаг оронуудай тамирай хүгжэлтын түлөө ехэ ажал ябуулдаг хүн.
Түрэл Зугаалайдаа ажаһуухадаа, тамираар һонирхожо эхилһэн. Багадаа хүдөөгэй хүбүүдтэл адли футбол наадаһан, барилдаһан... Нютагтаа бэлигтэй һоригшод Базаржап Бадмаев, Батор Доржинимаев гэгшэдтэ заалгажа, дээдэ гарай барилдаашан болоо һэн. Советскэ Союзай Баатар Базар Ринчиногой мүнхэ дурасхаалай мүрысөөндэ 5 дахин, Бадма Цыреновэй дурасхаалай кубогай түлөө мүрысөөндэ Могойтын аймагаа түлөөлжэ, нэгэтэ бэшэ оройлһон юм. Залуу ябахадаа, Советскэ Союзай хоёр дахин Баатар А.И.Покрышкинай шангай мүрысөөндэ мүнгэн медальда хүртэһэн габьяатай. Тиигэжэ үндэр хэмжээнэй мүрысөөнүүдтэ амжалта туйлажа, дүрэ буляалдаата барилдаагаар СССР-эй тамирай мастер болоһон гээшэ.
Владимир Жалсараев Улаан-Үдэ хотодо олон жэлдэ ажаһуухадаа, олзын хэрэг эрхилэлгэдэ, таряашанай-фермерскэ ажахыда, барилгада бэеэ зорюулан хүдэлөө. 2019 ондо «Зугаалай» гэһэн барилдаанай клуб байгуулһан юм. Юундэ «Зугаалай» гэжэ нэрэтэйб гэхэдэ, түрэл нютагтань иимэ нэрэтэй клуб олон жэл хүдэлдэг байһан. Нютагайнгаа нэрэтэй клуб Буряадай ниислэл хотодо үнинэй байгуулха зорилготой ябадаг һэн. Үхибүүдые бэе махабад һайтай, тэнхээ тамиртай байлгахын тула һорилгын танхим бии болгожо, ажал ябуулжа эхилһэн түүхэтэй.
Эрдэни ЧИМИТДОРЖИЕВ.
«Зугаалай» клуб бэрхэ барилдаашадые бэлдэнэ
- Информация о материале
- Автор: Эрдэни ЧИМИТДОРЖИЕВ.
- Категория: Алтан үлгы - Агамнай
- Просмотров: 249
