Нимбу Ламожапов
Ага-Хангил нютагай Хулинда гэжэ газарта 1923 ондо Зоригтын Ламажабтанай гэр бүлэдэ түрэһэн намтартай. 1940 ондо Нимбу Ламожапов Эрхүүгэй можын Тулун хотодо ниидэлгын һургуули дүүргэмсээрээ, Новосибирскын артиллерийскэ училищи эльгээгдэһэн байгаа. Ушарынь гэхэдэ, дайшалхы самолёдуудай дуталдаһан ушарһаа сэрэгэй хүтэлбэри иимэ шиидхэбэри абаһан юм. 1942 ондо тэндэһээ лейтенант Нимбу Ламожапов фронт эльгээгдээ. Прибалтийска фронтын бүридэлдэ немецүүдэй бүһэлүүрһээ Ленинград хото эрэлхэг зоригтойгоор хамгаалалсаһанай түлөө «За оборону Ленинграда» медаляар шагнагдаа һэн. 1944 оной июлиин 22-то Псков хото шадар болоһон шанга байлдаанда лейтенант Ламожапов шадамар бэрхэ, эрэлхэг зоригтой командир байжа, үхэр буунуудай таһалгаряагүй буудалдаан соогуур тагнуул хэжэ, немецүүдэй эгээ аюултай долоон точко элирүүлһэн ха. Зориг баатаршалга гаргаһанай түлөө сэрэгшэ Эсэгэ ороноо хамгаалгын дайнай 2-дохи шатын орденоор шагнагдаһан.
1944 оной августын 2-то Родая тосхон шадар Нимбу Ламожапов шархатабашье, даажа абаад ябаһан сэрэгшэдээ орхингүй, аюул багатай, хамгаалхада бэлэн газарта нэгэшье хүнөө гээлтэ хоролтогүйгөөр туһаламжын ерэтэр хүлеэжэ шадаһан байгаа. 67-дохи Армиин командовани Ламожаповай жэшээ үндэрөөр сэгнэжэ, Эсэгэ ороноо хамгаалгын дайнай 1-дэхи шатын орденоор шагнаһан юм.
1945 оной январиин 28-да Агын талын шэн зоригтой лейтенант Нимбу Ламожапов Калининградай можын Багратионовско аймагай Брюнесхоф гэжэ газарта байлдаанда эрэлхэгээр тэмсэжэ ябатараа, хоёрдохёо хүндөөр шархатаа. Медсанбат ошохо харгыдаа ами наһантаяа хахасаха хуби заяатай байшоо. Шэн габьяа, баатаршалга гаргаһанай түлөө Нимбу Ламожапов Эсэгэ ороноо хамгаалгын дайнай I шатын орденоор шагнагдаа һэн.
Тоонто нютагтань баатар хүбүүнэй нэрэ мүнхэлһэн волейболоор мүрысөөн хоёр жэлэй нэгэ удаа үндэр хэмжээндэ үнгэргэгдэдэг юм.
Даширабдан Батомункуев

Д.Батомункуев.
1922 ондо Ага-Хангилда түрэһэн. Хорин хоёртой Даширабдан Агын багшанарай училищи дүүргээд, Красноярскын хизаарай Канскын сэрэгэй ниидэлгын һургуулида ороһон байна. Эсэгын дайнай эхилэмсээр, курсантнууд фронт эльгээгдээ. 1942 онһоо 56-дахи артиллерийскэ полкын бүридэлдэ Дон шадархи шанга байлдаануудта дайсадтай тэмсэһэн габьяатай.
(Үргэлжэлэлынь 18-дахи дугаарта).
Дулмажаб ЦЫНГУЕВА, Догой нютагай музей даагша.
