- Людмила Цыбенжаповна, энэ гэр-музей хэзээ байгуулагдааб?
   - 2000 оной май һарада «Алхана» хүдөө һууринай захиргаанай ба арад зоной үүсхэлээр гэр-музей байгуулагдаһан, үндэһэ һуури табигшань – минии аба Цыбенжаб Доржиев. Бадма Жабоной хубиин эд зөөри, хубсаһаниинь булта экспонадууд болоһон, нютагайхид сэрэгшын хэрэгсэлнүүдые суглуулаа. Бадма Жапович бодонгууд угай. Баир хүбүүниинь бодонгуудай угай бэшэг зохёоһон, тэрэнь ханада үлгөөтэй. 2006 ондо музейн хорёо соо Россиин Баатарта зорюулагдаһан стелэ бодхоогдоһон.
   - Шэнэ музей тухай хөөрэжэ үгыт даа.
   - 2015 ондо Эсэгэ ороноо хамгаалгын Агууехэ дайнда Илалта туйлаһааар 70 жэлэй ойн баяраар дашарамдуулан, зоной мүнгөөр, Россиин габьяата архитектор Болот Дондоковой түлэблэлөөр Бадма Жабоной гэрэй урда талада томо, үндэр залгалаа байшан баригдаад, «Зал Боевой Славы» болгогдоо, тиигэжэ гэр-музей үргэдхэгдөө һэн. 2015 оной сентябриин 2-то гэр-музейн хорёо соо Дурасхаалай парк зохёогдоо, модод таригдаа бэлэй.
   2017 ондо Алхана һууринай байгуулагдаһаар 100 жэлэй ойн баяр тэмдэглэгдэхэдэ, минии үетэн, 1966 онойхид, партизанска газар гэр баряа һэн. Бато Гомбоевой хэһэн македынь музей соо хадагалаатай. Мүн тиихэдэ Эсэгын дайнда хабаадаhан нютагай ветерануудай намтар суглуулаабди, манай нютагһаа дайнда 141 хүн ошоһон, 63 хүниинь бусаагүй.
   Музейн соо Бадма Жабондо, дайнда хабаадаһан нютагайхидта, сэрэгэй тусхай үйлэ хэрэгтэ хабаадажа, баатарлигаар унаһан 15 хүбүүдтэ зорюулагдаһан «Они не вернулись из боя», «Наши земляки, погибшие за Родину», «С победой возвратились домой», «Наш земляк – воин-интернационалист», «Славные сыны земли алханайской», «Помним, скорбим, чтим» стенднүүд зохёогдонхой. Афганистан дайнда хабаадаһан Балдан Дугаров тухай баян материал бии. Тэрэ Улаан Одоной орденоор, «За отвагу», «За воинскую доблесть» гэһэн медальнуудаар шагнагдаһан, мүнөө Шэтэдэ байдаг. Чечен дайнда ябаһан хүбүүд тухай мэдээнүүд бии. Сандан Дашиев Сандан Санжиев хоёр танкова биатлоноор дэлхэйн чемпионадта хэдэн дахин илаһан.

You have no rights to post comments