Буряад арадаймнай эгээл бэлигтэй хүбүүдэй нэгэн Баир Жалсанов 2023 оной июлиин 29-дэ 48-дахи наһандаа алтан дэлхэйтэеэ хахасаа һэн. Баир Баторович Агын тойрогто, Буряад Уласта ажаһууха сагтаа олониитэ зондо мэдээжэ, нүхэдэйнгөө дунда хүндэтэй хүн байһан юм. Тэрэ буряад хэлэнэйнгээ хүгжэлтэдэ сэгнэшэгүй хубитаяа, нүлөө оруулһан хүн болоно. Эхэ хэлэнэйнгээ байдалай түлөө һанаагаа зобохо, тэрээндэ түмэн зониие эльгэлэн дурлуулха гэжэ наһан соогоо оролдожо ябаһан гээшэ.
Хүгшэдэй дунда үндыһэн
Баир Жалсанов Агын аймагай Һүдэнтэ нютагта Батор Жалсанович ба Ганжитма Цыреторовна Жалсановтанай гэр бүлэдэ гурбан хүүгэдэй ехэнь боложо түрэһэн юм. Дороо дахуулха Марина басаган, Жамбал хүбүүн дүүнэртэй. Аба эжынь бүхэли наһаараа Һүдэнтын дунда һургуулида багшалһан. Ганжитма Жалсанова эжынь һургуулиин захиралаар олон жэлдэ ажаллаһан, РФ-гэй габьяата багша нэрэ зэргэтэй. Батор Жалсанович абань түрүүн ажахыдаа, удаань дүшэ гаран жэлэй туршада һургуулида трудай, авто-унаагай, трактор техникын хэшээлнүүдэй багшаар, интернадые даагшаар ажаллаһан. Баир хүбүүн хоёртойхон ябахадаа, Долгор хүгшэн эжытэеэ үндыжэ, хүмүүжүүлгэ гараһан. Хүгшэн эжынь аша хүбүүндээ түрэл хэлэ ба бэшэгэй, ёһо заншалай мэдэсэнүүдые зааһан. Мүн хажуудань Баирай Янжима элинсэг эхэнь, Долсон нагаса эжынь ажаһуулсажа, хүбүүе эрхэлүүлжэ, үзэг бэшэгтэ һургаһан. Тиихэдэ хүршэнэр – баһал үндэр наһатай Борогшон, Байгарма, Пагма эгэшэнэр, Мункөөдэй, Цырендоржи үбгэд Баирай хүмүүжүүлгэдэ хубитаяа оруулалсаһан гээшэ. Тиигэжэ хүгшэдэй дунда үндыһэн хүбүүн наһанай шанга һургаал багаһаа абаһан байха юм.
Баир Жалсанов һургуулида һурахадаа, һүбэлгэн һонор ухаатай, багшанартаа хүндэтэй, үетэнөө дахуулжа, ударидажа ябаха шадабаритай байһан. 1992 ондо дунда һургуулияа дүүргээд, Улаан-Үдэдэ Доржо Банзаровай нэрэмжэтэ багшанарай институдта буряад хэлэ бэшэгэй ба литературын факультедтэ оюутан боложо ороо һэн. Тэндэ һураха сагтаа ерээдүйдэ буряад арадай түрүү хүнүүд болохо хүбүүд басагадтай һураһан. Хэд бэ гэбэл, Баир Балданов, Баир Ширапов, Булат Шойнжонов гээд лэ угаа олон юм. Баир Жалсанов суг һураһан нүхэдтэеэ олон жэлдэ харилсажа, гэр бүлөөрөө нүхэсэжэ ябаһан гээшэ. Агын талын хүбүүн оюутан ябахадаа, Буряад Уласай Гунсэма басагантай айл бүлэ боложо, һургуулияа амжалтатай түгэсхэжэ, түрэл Һүдэнтэеэ бусаһан ха. Һүдэнтын дунда һургуулида Баир буряад хэлэ ба литература, Гунсэма ород хэлэ ба литература заажа эхилээ. Удангүй залуу бүлэдэ Булат хүбүүн мүндэлөө. Баир Жалсанов нютагтаа багшалхын хажуугаар залуушуулай талаар ниитэ ажал эдэбхитэй ябуулдаг һэн. Зунай амаралтада гэртээ ерэһэн оюутадые, сэрэгэй албанһаа табигдаһан хүбүүдые ударидажа, ниитэ ажалда, слёдто хабаадуулха. Залуушуулай сүлөө сагаа ашатайгаар үнгэргэлгэдэ ехэ ажал ябуулдаг байһыень онсо тэмдэглэмээр.
