Зурагуудынь хэтэ мүнхэдөө
   Дурасхаалай хэмжээ ябуулгада Борис Бадмажаповай түрэлхид, шабинар, суг хүдэлһэн нүхэд, засагай түлөөлэгшэд, соёлой талаар ажал ябуулагшад хабаадаа.
   Борис Бадмажапов алтан дэлхэйдэ мэндэ ябаха сагтаа буряад урлалай хүгжэлтэдэ ехэ хубитаяа оруулһан, гүнзэ-гы мүр сараа үлөөһэн габьяатай. Тэрэнэй үзэсхэлэнтэ зурагууд мүнөө хаа-хаанагүй ордон байшануудые шэмэглэдэг, музейнүүдтэ хадагалагдажа, зоной анхарал татадаг. Хүндэтэ багшынгаа нангин хэрэг мүнөөдэр олон тоото шабинарынь үргэлжэлүүлнэ.
   Уран зурааша 1942 ондо Агын Буряадай тойрогой Урда-Ага нютагта түрэһэн намтартай. Агын хоёрдохи дунда һургуули дүүргээд, Эрхүү хотын «Иркутскжилстрой» эмхидэ арматурщик-бетонщик мэргэжэлээр ажалайнгаа намтар эхилһэн. Саашадаа аяар холын Заполярида Совет Армиин эрэ хүнэй уялгата алба гараад, 1964 ондо Эрхүү хото бусажа, урид хүдэлжэ ябаһан ажалдаа орожо ажаллаһан байна. Залуу ябахадаа, Борис Бадмажапов өөрын графическа зурагуудай үзэсхэлэн дэлгээжэ эхилһэн юм. Элдин тоонтынгоо энгэртэ зүрхэ сэдьхэлээрээ тэгүүлдэг уран зурааша зохёохы хэрэгүүдые эрхилээ. Энэ үедэ Ага нютагта залуу уран зураашын хүдэлмэринүүдэй түрүүшын үзэсхэлэн амжалтатай үнгэргэгдэжэ, олоной һонирхол татаһан ба мэргэжэлтэдэй үндэр сэгнэлтэдэ хүртэһэн шуу. Уданшьегүй Борис Бадмажапов Эрхүүгэй уран һайханай училищиин оюутан боложо ороод, аргагүй оролдосотойгоор һураһан юм. Тэрэ жэлынь Эрхүүгэй багшанар залуу хүбүүнэй талаан бэлигые ойлгожо, 2-дохи курсын оюутан болгоһон байна. Түрэхын һүбэлгэн ухаатай хүбүүн уран зурагай оньһо гүнзэгыгөөр шудалжа, эрдэм мэдэсэеэ дээшэлүүлһэн, оюун бэлигээ хурсадхаһан. Саашадаа тэрэ нютагаа уран зураашын мэргэжэлтэнэй дипломтой бусаад, 1968 ондо Могойтын аймагай Сагаан-Уула, Догой нютагуудай дунда һургуулинуудта зурагай ба черчениин багшаар хүдэлһэн ха. Сагаан-Уулада соёлой байшанай захиралаар томилогдоо. Могойтын аймагта амжалтатай хүдэлжэ байһанаа, 1976 ондо Ага тосхон зөөжэ ерээд, хүүгэдэй уран һайханай һургуулиин захиралаар ажаллаһан намтартай. Эндэ уран зураашын хуби заяанай эгээл эршэмтэй ба һонирхолтой хэһэгынь эхилһэн юм.

You have no rights to post comments