Дашинима Норбоевич Урда-Агын Хүйтэн гэжэ газарта 1936 ондо Догой нютагай сагаангууд угай Раднын Норбын ба Дунгилайн Долгор хоёрой бүлэдэ 6 хүүгэдэй 4-дэхи үринь боложо түрэһэн.
   Тэрэ 30 наһатайдаа номо гартаа баряад, 50 гаран жэл табяагүй. Дашинима Норбоев «Эрхы мэргэн» гэжэ алдартай, Эсэгэ ороноо хамгаалгын дайнда мэргэн буудагша ябаһан Цырендоржи Жамсоевтой уулзажа, һур харбалгын амта абаһан юм. Тиигэжэ наһанайнгаа 43 жэлыень ургажа ябаһан үетэниие хүмүүжүүлгэдэ зорюулһан юм. Дашинима Норбоевич СССР-эй болон Россиин тамирай 30-аад мастернуудые, уласхоорондын классай тамирай 3 мастернуудые, тамирай габьяата 2 мастернуудые бэлдэһэн. Эгээ ехэ амжалта туйлаһан хүмүүжэмэлнүүдынь гэхэдэ, СССР-эй тамирай габьяата мастер, «Дружба-1984» наадануудай илагша Ханда-Цырен Гомбожапова болон Россиин тамирай габьяата мастер, Лондондо үнгэргэгдэһэн паралимпиин наадануудай 2 удаа илагша Тимур Тучинов гэгшэд болоно.
   Суута шабинь иигэжэ хөөрэбэ: «Дашинима Норбоевичой 2005 ондо Амидхаашын дунда һургуулида һур харбаанай секци нээхэдэ, суг һурадаг нүхэдтэеэ ябажа эхилээ һэм. Хоёр нүхэдни тамирай мастерта кандидадууд болоо, би һүүлдэнь энэл жэлдэ тамирай мастерай зэргэ дүүргээб. Һоригшомни хүл муутай зоной паралимпиин нааданууд байдаг гээд, намайе мүрысөөнүүдтэ бэлдэжэ эхилээ. 2005 оной зун Россиин мүрысөөндэ 2-дохи һуури эзэлээб, дэлхэйн мүрысөөндэ – 15-дахиие, Дашинима Норбоевич Һамадай абгайтай (нүхэрынь) «копейкэ» «Жигулигаараа» ерэжэ, сугтаа намайе һоридог һэн. Зундаа гэрэйнь газаа харбадаг һэнби. Һамадай абгай 2005 оной ноябрь һарада наһа бараа. Тэрэ гэһээр 2009 он болотор намайе Дашинима Норбоевич һорижо ябаа. Ехэл холын бодолтой хүн байжа, энэ хүбүүн паралимпиин тамир руу ябаха арга боломжотой гэжэ хараһан байна. Хүгжэжэ, дүршэлтэй боложо, ганса паралимпиин янзануудаар бэшэ, бэшэшье зонтой адли харбажа, Россиин мүрысөөндэ 2-дохи ба 3-дахи һууринуудые эзэлһэнби. Норбоевич һайнаар заадаг, заабаринуудаарнь хүгжөөб. Шангаар дуугардаггүй, түбшэн хүн һэн. Нэрэ солотой, суутай болоһондоо һоригшодоо ехэ баяртайб.

You have no rights to post comments