«Саг гээшэ голой урасхал мэтэ түргэн үнгэрнэ даа. Арбан долоотой байхадаа, залуушуулай хоорондо дэлхэйн абарга, гушан хоёртойдоо Олимпиин наадануудай илагшадай ендэр дээрэ гараа һэм. Хитадай Бээжэндэ 2008 ондо үнгэргэгдэhэн Олимпиин наадануудта hур харбалгаар хүрэл медальда хүртэһэн түүхэтэ үйлэ хэрэг үсэгэлдэр болоһон мэтээр намда һанагдадаг», - гэжэ тамиршан хэлээ һэн. Тэрэ Зугаалай нютагта Пурбо-Доржи Амагаевич ба Цыбегмит Базарсадаевна Бадёновтоной гэр бүлэдэ 1976 ондо түрэһэн. Зугаалайн үхибүүд багаhаа hур харбаанай гү, али барилдаанай секци шэлэжэ, бэеэ hоридог гэжэ мэдээжэ. Баир арба наhатайhаа талаан бэлигтэй hоригшо Балта Цынгуевай хүтэлбэрилдэг hур харбаанай секцидэ ябажа эхилhэн байна. Балта Цырендоржиевич Баирые hур харбалгада эльгэлэн дурлуулжа, тамирай ехэ замда гаргаhан намтартай. Баирай нагаса аба Цыденжап Батуев hур харбалгаар СССР-эй тамирай мастер юм. Нютаг нугадаа мэдээжэ мэргэн харбаашан ябаһан. Нагаса абань холын мүрысөөнүүдтэ хабаадажа ерээд, ябаhан хараhанаа зээ хүбүүндээ хөөрэдэг байhан ха. Нагаса абынгаа хэлэһэн туhатай зүбшэл, заабаринуудыень зүрхэнэйнгөө оёорто нангинаар хадагалаад ябадаг бэлэй.
Арадаа суурхуулһан мэргэн
- Информация о материале
- Автор: Эрдэни ЧИМИТДОРЖИЕВ.
- Категория: Алтан үлгы - Агамнай
- Просмотров: 55
