Алдар Чирнинов гушан хоёр наhандаа юридическэ эрдэмүүдэй докторой нэрэ зэргэ хамгаалаа, мүнөө гушан гурбатайдаа Номгон далайн гүрэнэй университедэй (саашань ТОГУ) нэгэдэхи проректор, профессор. Иимэ амжалта дабшалтануудтайгаар харюусалга ехэтэй тушаалда ажал эрхилхэ гээшэмнай түрэhөөр талаан бэлигэй хажуугаар аба эжын хүмүүжэл, багшанарайнь эрдэм олгуулга, өөрын оролдолго, залгаа олон жэлнүүдэй забдагүй хүдэлмэриин үрэ дүн ха юм.
Могойтын аймагай Ага-Хангил нютагай Мункожаргал Цыренжапович ба Людмила Дугардоржиевна Чирниновтэнэй бүлэдэ 1993 оной апрелиин 7-до түрэhэн. Радна ахатаяа хоорондоо оройдоол жэл хахадай илгаатай, хоюулаа наадажал үндыhэншье hаа, ахань ахаяа мэдэхэ, дүүнь дүүб гэжэ мэдэхэ, гуримтайханаар hураhан хүүгэд байгаа. Эжынь нютагтаа врачаар хүдэлхэ, абань түргэн туhаламжын унаа жолоодохо, олзын хэрэг эрхилэгшэ, амаралта болон hайндэрые мэдэхэгүй ажалтай гэртэхинтэй хүүгэдтэ, хэзээшье, гэрэй ажал бэе дээрээ абаха саг мэнэл тудадаг hэн бэзэ. Тиимэhээ харюусалга гээшэ эли бэшэхэнээр эдэ хүбүүдэй ухаанда нэбтэрhэншье байжа болоо. Гэбэшье, гүн ухаан хүндэ эли бэшэхэнээр нэбтэрэн ородоггүйшүү ааб даа. Зүб мүрөөр хүмүүжүүлэгдэhэн хүүгэд hуралсалдаашье оролдосотой, бүхы хэмжээ ябуулгануудта эдэбхитэй хабаададаг, олимпиаданууд болон «Шаг в будущее» эрдэмэй-дүршэл абалгын хуралдаануудта амжалта туйладаг hэн гэхэ. Алдарайшье эрдэм шэнжэлэлгэ дунда hургуулиhаа эхитэй байба ха юм. Ахань, Радна, Шэтын гүрэнэй эмнэлгын академи, удаань ординатура дүүргээд, хизаарай клиническэ больницада анестезиолог-реаниматологоор ажаллана.
Үргэлжэлэлынь "Толон" һониной 2026 оной 38-дахи дугаарта.
