Цыдып Балданович Балдановай балшар бага ба залуу наһан дайнай ба дайнай һүүлээрхи үедэ үнгэрһэн. Тэрэ 1939 ондо Урда-Ага нютагта түрэһэн намтартай. Сампилай Сойсорма эжынь 33 партизануудай нэрэмжэтэ колхоздо һаалишанаар хүдэлһэн. Тиимэһээ Цыдып хүбүүн бага наһанһаа эжынгээ хажууда ёһотой туһамаршаниинь боложо үндыгөө. Һургуулияа дүүргээд, Шэтын гүрэнэй эмнэлгын институдта орожо, һанаһан хүсэлөө дүүрэн бэелүүлһэн байна.
   Бүхы юумэн эхи захатай гэдэгтэл, Агын больница 1921 ондо нээгдэхэдээ, хүгжэлтэ абажа үргэдхэгдөө. 1964 ондо институт дүүргэһэн, багаһаа хүниие хайрлаха, ядаһанда туһалха гэжэ оролдодог Цыдып Балданович Агын тойрогой больницада хирургаар орожо, ажалайнгаа намтар эхилһэн. Тиигэжэ үбшэнтэниие аргалха буянтай ажалда бүхы наһаяа зорюулаа.
   Тэрэ үедэ тойрог дотор хорото хабдар бүри һүжэрэнхэй байгаа. Тиимэһээ иимэ үбшэ аргалха тусхай эмшэнэй үгы байһан дээрэһээ хирургаар хүдэлөөд, һүүлдэнь хирургическа таһагые даагшаар томилогдоод байһан Цыдып Балданович Белоруссиин эрдэм-шэнжэлэлгын онкологиин институт эльгээгдэһэн байна. Цыдып Балданович 1968 оной август һараһаа эхилээд, дүн хамта хахад жэл тухай тусхай һуралсал гараа. Эрдэмтэй эмшэн нютагаа бусахадаа, хорото хабдар эхин шатадань элирүүлхэ зорилготойгоор ажалнуудые ябуулаа. Айлаар ябажа, хүнүүдые үзэдэг, харадаг байһан. Аймшагтай үбшэ тогтоохо талаар химиотерапиин шэнэ аргануудые нэбтэрүүлээ, хүнүүдые үбшэнэй зоболонһоо аршалха гэһэн уялгатайгаар хамсыгаа шамаад лэ хүдэлөө.

You have no rights to post comments