Октябриин 2-һоо 10 болотор Ага тосхоной хүүгэдэй бүхы сэсэрлигүүдтэ Буряад хэлэнэй һарын хэмжээндэ «ДалиТЭ» театрай артистнар зүжэглэмэл наадануудые табина.

 

Б.Ринчинова, С.Жамсаранова нааданай үедэ.

 

Тон түрүүн «Туяа» ба «Малыш» сэсэрлигүүдэй хүмүүжэмэлнүүдтэ гоё һайхан шэмэглэлтэй тайзан дээрэ дүрэдөө таарама хубсаһатай артистнар уран һайханаар наада харуулба.

Ямар зорилготойгоор «ДалиТЭ» театрай артистнар ород арадай «Маша и медведь» онтохон харуулбаб гэһэн асуудалтайгаар хүгшэн эжын дүрэ наадаһан артистка Баярма Ринчиновада хандаһамнай, иимэ харюу үгэбэ: «Буряадаар зүжэг харуулхада, хүүгэд хахадыень ойлгоногүй. Ородһоо буряад оршуулгатайгаар харуулхада, баһал тааруугүй байдаг. Тиимэһээ зүжэг нааданайнгаа эхиндэ ба эсэстэ хүүгэдтэй буряадаар хөөрэлдэхэ гэжэ шиидээбди. Хүүгэдэй буряад хэлэнэй нөөсэ үргэдхэхэ, түрэл хэлэндэнь һонирхол татуулха гэһэн зорилготойбди».

«Туяа» сэсэрлигэй һургуулиин урда тээхи бэлэдхэлэй бүлэгэй хүмүүжүүлэгшэ Долгоржап Найдановагай хэлэһээр, нёдондо апрель соо «ДалиТЭ» театрай артистнарай буряад хэлэн дээрэ «Красная шапочка» зүжэг харуулаад, асуудалнуудые һурахадань, хүүгэд ойлгоногүй һэн. «Тиихэдээ ойлгодоггүй хүүгэд шууялдажа эхилнэ, нүгөө талаһаа, артистнарта - өөһэдтэньшье оршуулжа байхадань, хүндэ байгаа ёһотой. Тэрээнһээ боложо, мүнөө артистнар зүжэгүүдээ ород хэлэн дээрэ харуулба гээшэ бэзэ. Мүнөө артистнар хүүгэдтэй буряадаар хөөрэлдэхые оролдобо, тиигэбэшье бүхыдөө артистнарай уулзалга ород хэлэн дээрэ үнгэргэгдѳѳ, мэдээжэ юрын лэ зүжэг ха юм даа. «Красная шапочка» зүжэг оршуулгатай харуулагдахадаа, һонин байгаа һэн. Хүүгэд асуудалнуудые ойлгоогүйшье һаа, «Эй, энэ юун бэ? Ерэ, бодо, ошо» г.м. үдэр бүри хэрэглэгдэдэг үгэнүүдые хадуужа, ойлгохошье байжа болоо. Минии һанамжаар, буряад хэлэн дээрэ зүжэг харуулаа һаань, аша үрэтэй байха һэн. Би хэдэн жэл бэлэдхэлэй бүлэгүүдые абаад ябанаб. Хүүгэдтэ «Традиции и обычаи бурятского народа» гэһэн шагай нааданай хэшээлнүүдые ябуулдагби, Сагаан һарын ба «Барбаадай» гэжэ шүлэгэй конкурсдо хүүгэдые өөрөө бэлдүүлдэгби, үшөө буряад хэлэнэй багшамнай ажал ябуулдаг. Шүлэг сээжэлдэхэ даабари гэртэнь үгэдэгби. Өөрөө буряад хадаа бүлэг соогоо хүүгэдтэй буряадаар хөөрэлдэдэгби. Дуугархадамни, хүүгэд ойлгодог, харин харюусажа шададаггүй. Бүлэг соомни дуугаржа шадаха 5-6 үхибүүд бии, тэдэ хүгшэн аба эжытэеэ байдаг гү, али буряадаар дуугардаг гэртэхинтэй хүүгэд болоно. Залуу гэртэхин түрэл хэлэеэ мэдэнэгүй, хүүгэдыньшье - баһал тиимэ байдалда. Бидэнэй сэсэрлигтэ арга шадалаараа түрэл хэлэндээ һургаха гэжэ оролдоошье һаамнай, хүүгэд гэртээл хүмүүжэнэ, ехэ юумэндэ һурана ха юм. Гэртээ бодо, унта, нюураа угаа гэхэһээ эхилээд хэлүүлжэ байгаа һаа, хадууха, ойлгохо бшуу. Олонхи хүмүүжүүлэгшэд ба намайе һэлгэдэг багшашье ород яһанай юм. Буряад хэлэнэй багша долоон хоногой нэгэ удаа 1-1 часаар бүлэг бүхэнтэй хүдэлдэг. Хүүгэд тоо, үнгэ, гэр бүлэ, гэрэй, зэрлиг амитад г.м. тухай сэсэрлигһээ мэдэхэ ёhотой гээшэ ааб даа», - гээд багша хөөрэбэ.

 

 Дэлгэрэнгыгээр 41-дэхи дугаарта.

 

You have no rights to post comments