Буряад хэлэнэй һарын хэмжээндэ «Алтан үлгы – Агамнай» гэһэн гаршаг доро буряад уран шүлэгэй үдэшэ аймагай түб һуурин бүхэндэ эмхидхэгдээ.

Б. Гармажапов (зүүн гарһаа), Б. Шагдаров, Ш-Х. Базарсадаева, Д.Батоболотова.
Ага тосхондо үнгэргэгдэһэн үдэшын хабаадагша гол нюурнууд гэхэдэ, мэдээжэ поэдүүд, Россиин Уран зохёолшодой холбооной гэшүүд: Батожаргал Гармажапов, Батор Шагдаров, Шуя-Ханда Базарсадаева ба Дугарма Батоболотова болоо. Мүн гуурһанай хаба туршажа байһан шүлэгшэд, “Алтаргана -2016” нааданай уран шүлэгэй конкурсдо хабаадагшад: Хойто-Ага нютагай ажаһуугша Баиржаб Бадмаев, Һүдэнтын Долгор Дашидондокова ба Согто-Хангилай Светлана Махабадарова гэгшэд шүлэгүүдээ уран гоёор уншаа.
Энэ буряад шүлэгэй һайндэрые Агын Буряадай тойрогой Захиргаан, хизаарай буряад соёл хүгжѳѳлгын түб болон Агын аймагай Б-Б. Намсараевай нэрэмжэтэ номой сан эмхидхэһэн байна.
Буряад уран шүлэгэй үдэшэ үргэн дэлисэтэйгээр эмхидхэхэ хэрэгтэй гэһэн хѳѳрэлдѳѳн «Алтаргана–2016» нааданда хабаадаха поэдүүдые шэлэлгын үедэ болоһон байна. Энээн тухай Агын аймагай Б-Б. Намсараевай нэрэмжэтэ номой сангай директор Дарима Цэдашиева мэдээсэбэ. “Буряад хэлэндээ дуратай зон эндэ суглараа гэжэ һананаб. Түрэл хэлэн... Эжынгээ умайһаа гарахадаа, “би буряад гээшэб” гэжэ энэ дэлхэй дээрэ бии болообди. Мүнѳѳ сагта буряадаар һайнаар дуугархагүй үетэн үндыжэ байна. Тиимэһээ эгээл мүнѳѳдэр буряад уран шүлэгэй һайндэртэ ерэһэн залуушуулда баярые хүргэнэб. Буряад хэлээрээ, уран шүлэгѳѳр һонирхожо ерээт, түрэл хэлэмнай ямар баян гээшэб гэжэ ойлгожо, үетэн нүхэдѳѳ хэлэеэ бү мартаял, дэлгэрүүлэел гэжэ уряалха бата һанамжатай эндэһээ гарахат гэжэ найданаб”, - гэжэ уряалха буряад шүлэгэй һайндэр нээхэдээ, Дарима Батомункуевна тэмдэглэһэн байна.
Нээрээшье, Агын аймагай соёлой байшан соо шүлэгэй һайндэртэ зон яһала суглараа. Юундэ “яһала” гэнэбши гэхэдэ, түрүүн “мүнѳѳ сагта хэн шүлэг шагнахаяа ерэхэ хаб, тииһээ тиитэрээ буряад хэлэн дээрэ” гэһэн һанамжа толгой соом эрьелдэн байгаа бэлэй. Теэд хахад зал тухай болохоор харагшад суглараал. Саашадаашье иимэрхүү шүлэгэй һайндэрнүүдые таһалдуулангүй эмхидхэжэ байбал, зон шүлэгѳѳр, түрэл хэлээрээ һонирхохол ха. Заншалта болоо һаань, шүлэг зохёолго, шүлэг уншалга үеһѳѳ үедэ дамжуулагдажа магад. Тиигээ бол, буряад хэлэеэ, уран зохёолоо – бүхыдѳѳ үндэһэн соёлоо зандань үлѳѳхэмнай лабтай. Тиимэһээ буряад шүлэгэй һайндэрнүүдые эмхидхэлгэдэ ниигэм, бүгэдэ зон хабаадаа һаа, бад гэмэ ехэ дүнтэй байха бшуу.
Дэлгэрэнгыгээр 44-дэхи дугаарта.
