Манай Забайкалида мяха буйлуулжа, эдеэ хоолой элбэг зүйлнүүдые гаргадаг томо комбинат, цехүүд нэгэн-хоёр үлэнхэй.

Тэдэнэй нэгэн манай тойрогой дэбисхэр дээрэ оршодог Агын мяханай комбинат болоно. Мүнгэн hангай дуталдаhан ба экономикын хүгжэлтын шахардуу байдалай болобошье, комбинат ажалаа нэгэшье hуладхуулангүй хүдэлhѳѳр зандаа.

ЗАСАГ ЗУРГААНАЙ ДЭМЖЭЛТЭЭР

Агын мяханай комбинат 1992 ондо байгуулагдажа, мүнѳѳ болотор мяханай зүйлнүүдые буйлуулжа, арад зондоо эдеэ хоол элбэгээр дурадхажа байдаг гээшэ. Тойрогой амяараа бэеэ даанги нютаг байхада, нютагаймнай мяханай комбинат улам хүгжэлтэеэ абаhан гээшэ. Анха түрүүн хүйтэндэ хүрэшэhэн дулаасуулгын соргонууд hэлгүүлэгдээ, котельнидэ ехэ хүдэлмэри ябуулагдаа. Арбан табан авто-унаагай байха дулаан байра баригдаа, цехүүдтэ шэнэ хэрэгсэлнүүд абтагдаа бшуу.

2004 ондо тойрогой Захиргаанай дэмжэлтээр, тэрэ үедэ директор ябаhан Батоцырен Абидуевай үүсхэлээр колбаса гаргадаг цехтэ шэнэ хэрэгсэлнүүд абтагдаhан байха юм. Тэрэ жэлынь мяха хадагалдаг цех ашаглалгада тушаагдаhан түүхэтэй. Саада жэлынь мал үүсэлдэг цехэй байшан үргэдхэгдѳѳ, арhа мяха хадагалха байшангууд баригдаа бэлэй. Тэрэнэй удаа үшѳѳшье хэдэн цехүүд баригдаа, тэрэ тоодо огородой ургамалнуудые ба загаhа буйлуулдаг цех бии болоо hэн. Тэрэ сагта жэлэй хугасаада мяханай зүйлнүүдые хэдэн зуугаад тонноор болбосоруулдаг байгаа бшуу.

 

Комбинадай эдеэ хоолой зүйлнүүд. 

АРЕНДАТОР ШЭНЭ АМИСХАЛ ОРУУЛАА

Мүнѳѳнэй оршон сагта Агын мяханай комбинадай ажалай хэмжүүр бага болоhоншье hаа, хүдэлмэрилэгшэдынь ажалаа тогтоонгүй, бүри эршэдүүлжэ, урма зоригтой ябуулhаар гээшэ. Хэдэн жэлэй сана гүрэнэй ба хизаарай зүгhѳѳ дэмжэлтын багаар үзүүлэгдэжэ эхилхэдэ, комбинадай байдал муу болоhон байна. Тиин 2013 ондо комбинадай хүтэлбэридэ hэлгэлтэ хубилалтанууд болоо. Хэлсээ баталагдажа, мяханай комбинат муниципальна эмхи байhанаа, нээмэл бүлгэм болгогдоо. Байра байдалынь Агын аймагай захиргаанай мэ- дэлдэ үлэнхэй. Шэтэ хотын олзын хэрэг эрхилэгшэ Виталий Пучков мяханай комбинадые 5 жэлээр арендэдэ абажа, ажал ябуулна. Тэрэ комбинадай 9 сая 700 мянган түхэригэй үришэри хаагаад, нэмэлтэ 6 сая оруулаа. Тэрэ мүнгэн зѳѳриин ашаар мяха болбосоруулдаг шэнэ хэрэгсэлнүүд абтагдаа. Модульно котельни баригдажа, тэндэнь хоёр котёл табигдаа. Хуушарhан теплотрассанууд шэнэлэгдээ. Тиигэжэ мяханай комбинат 2013 оной августын 1-hээ шэнэ амисхалтайгаар хүдэлжэ эхилhэн түүхэтэй.

 

Технолог Б.Садаева тушёнкодо орохо эдеэ хоол бэлдэнэ. Донир ДОРЖИЕВАЙ фото-зураг.

Комбинадта мүнѳѳ 48 хүн ажаллана. Тэдэнэй дунда комбинадай байгуулагдаhан сагhаа хүдэлжэ эхилhэн дүй дүршэлтэй зон олон. Виталий Пучков анхан сагhаа хүдэлжэ байhан ажалша коллективэй диилэнхи хубииень үлѳѳжэ шадаа. Ажалшадайнь дунда наhан 39-дэ хүрэдэг. Салингаа саг соогоо абадаг гуримтай. Ажалшадайнь дунда зэргын салин 13800 түхэриг болодог. Эндээ хоол баридаг столовотой. 

Ажалшадаа саг зуура түлбэригүй амаралтада эльгээжэ байжа, хүндэ байдалhаа гарасалдаа аабза. Виталий Пучков Шэтэ хотодо байдагшье hаа, үе-үе болоод Ага ерэжэ, комбинадай ажал хэрэгүүдые харадаг, шиидхэгдээгүй асуудалнуудые шиидхэдэг. Комбинадай үйлэдбэриин ажалые Димчигма Хамаева ударидадаг юм. Мяханай комбинадта үйлэдбэриин, мяха үүсэлэлгын, үндэhэн хоолой зүйлнүүдые, полуфабрикадуудые буйлуулдаг гурбан цех хүдэлнэ. Анхан колбаса ба огородой эдеэ буйлуулдаг цехүүд хүдэлжэ байhанаа, мүнѳѳ ашаглагдахаяа болинхой. Колбаса гаргаhанай олзогүй байшоо. Огородой эдеэ ехээр хэрэглэдэг hургуули, сэсэрлигүүд ѳѳhэдын ажахытай болоо.

Дэлгэрэнгыгээр 41-дэхи дугаарта.

You have no rights to post comments