Түл абалгын хаhада зорюулан, мал ажалай мэргэжэлтэдэй болон малшадай дунда асуулта эмхидхэбэбди:
- Түл абалгаар ямар түсэбтэй байнабта?
-Түл абалгын үедэ шиидхэгдээгүй ямар асуудалнууд гарадаг бэ?
- Танай hанамжаар, хүдөөдэ мал харахаар гү?

Үбэр Байгалай хизаарай Хүдөө ажахын яаманай грамотаар хоёр дахин шагнагдаhан, Россиин Федерациин Хүдөө ажахын яаманhаа алтан часы бэлэгтэ хүртэhэн, «Родина» үүлтэртэ завод» СПК-гай түрүү хонишон, бодонгууд омогой, 68 наhатай ажалай ветеран Батоболот Дондоков:

 

Гэр бүлын архивай фото.


- Хониндо ороhоор, 22 жэл болообди. Совет үеhөө хони түрүүлhэмди. Тиихэдэ амар саг байhан ааб даа. һая болотор hайн түл абажа байгаабди. Мүнѳѳ жэл баhал һайн түл абахабди гэжэ найдагдана. Теэд ковид үбшэнэй hүжэрhѳѳр, хэмэл үрэжүүлгэ хэгдэхэеэ болинхой. Ганса хусаар үрэжүүлгэ хэгдэхэдээ, түрэhэниинь түрөөд, үгынь түрэдэггүй. Урда жэлнүүдтэ үрэжүүлгын хүрэнгэ тараадаг байгаа.
Мүнөө бидэ агын үүлтэрэй 315 толгой хонитойбди. Тэдэнэй 60-70-иинь шүлгэ хонид болоно. Ажахымнай обёос ургуулаад, хонишодтоо тараадаг. Үбhэ өөhэдын хүсѳѳр сабшадагбди, шэнгэн түлишыемнай ажахы даадаг. Худагтай болоhомди. Сакман апрелиин хорёодоор эхилхэ. Туhалагшад гэжэ үгы, Будаханда Цынгуева нүхэртэеэ, Намсарай ба Аюр хүбүүдтэеэ сакман абахабди. Үшөө үбhэн хэрэгтэй болохо, ажахымнай үбhэтэй, асарха юм бэзэ. Нёдондо жэлтэй сасуулхада, мүнөө жэл нилээн үбhэтэй байна гээшэбди. Нёдондо хүндэшэг байгаа. Холо сабшажа асараад, зөөдэл үбhэ отарануудта тараажа байдаг hэн.
Эрхим түл абахын тула хонидоо хаангүй, hайнаар адуулха хэрэгтэй. Бидэ үбhэ эдюулээд, үглөөгүүр обёос үгөөд, 9-10 сагта уhалаад, бэлшэхыень гарганабди. Яhала тарган болодог. Хонид садхалан байхадаа, өөhэдөө хашаартаа ерэжэ орошодог. Түрэлгэдэ бэлэн байнабди: хото хорёо, хашаар бэлэн, газаа досоохинь сагаадагдаhан.
Хүдөө гаража, өөрын hайн техникэтэй болоод лэ, мал олоор барихаар лэ даа. Бидэ гансал «Т-25» трактортайбди.
Залуушуул хүдөөдэ мал хараха дуратай байдаг, теэд сүлөө бууса үгы. Буусын сүлөө болоходо, буляалдаад лэ орошодог.
Нордоп БАБУЕВА.

You have no rights to post comments