Апрелиин 30-да Малай аргашанай уласхоорондын үдэр тэмдэглэгдэбэ.
Гүнэй нютагай ветеринарна участогые даагша, олон жэлдэ мал аргалжа ябаhан ажалай ветеран Октябрина Цырендоржиева тухай хэдэн үгэ.
Октябрина Санжиевна Гүнэй нютагта 1959 ондо түрэһэн. 1966 ондо эхин шатын һургуулида ороод, 1976 ондо дунда һургуулияа түгэсхөө. Нютагтаа хоёр жэлэй туршада ветеринарна санитараар хүдэлөө. Ветеринарай мэргэжэлтэй болохо хүсэлдэ абтаһан залуу басаган 1979 ондо Нэршүүгэй техникумэй оюутан боложо ороо һэн. Тэрэ үедэ хоёр хүүгэдтэй болоод байгаа, тиибэшье һуралсалаа орхингүй, 1985 ондо амжалтатай дүүргээ. Удаань мэргэжэлээ дээшэлүүлхэ зорилготойгоор Улаан-Үдын хүдөө ажахын дээдэ һургуулида орожо, малай аргашанай үнэмшэлгэтэй боложо гараһан байна.
2002 онhоо Гүнэй нютагтаа ветеринарна участогые даагшын харюусалга ехэтэй тушаалда хүдэлнэ. Ажалай ветеран, фельдшер Долгор Галсандоржиевна Дамбаева, нёдондо санитараар хүдэлхэеэ ерэһэн Юрий Батоболотович Цыбенов, Октябрина Санжиевна – эдэ гурбан эбтэй эетэйгээр хүдэлмэрилжэ, ажалаа саг соонь шанартайгаар бүтээхые оролдодог юм.
Мэргэжэлэйнгээ нарин оньһо оложо үрдеэдүй залуу мэргэжэлтэн Октябрина Цырендоржиевагай түрүүшээр тээлмэрдэхэ тулгардаха сагтань тэрэ үедэ Гүнэй нютагай XIX партсъездын нэрэмжэтэ колхозой ветеринарна врачаар хүдэлжэ ябаһан Цыдендамба Будажапов залууршаниинь боложо, зүбшэл заабаряар туһалһан ха. Тэрэнэй хүтэлбэри доро шэнэ мэргэжэлтэн олон юумэндэ һураад, он жэлэй ходорон ошохо бүхэндэ ажалдаа бүри улигтай, абьяас шадабаритай болоо һэн ааб даа. Мүнөө болоходо, Октябрина Санжиевна аха нүхэр тухайгаа «Цыдендамба аха 1938 оной, нютагаараа Һүдэнтын байһан, үндэр наhатай болоод, 2018 ондо наһанһаа нүгшөө бэлэй. Урин налгай, hайн һанаатай, зөөлэн зантай хүн юм һэн» гэжэ тон дулаахан үгэнүүдээр дурсадаг. Дүршэлтэй бэрхэ, дээдэ гарай мэргэжэлтэнэй һургаал заабарииень мүнөөшье ажалдаа баримталдаг зандаа.
Ветеринарна врач Октябрина Санжиевна малай үбшэ һэргылгын тарилга хэхэ, мал аргалха г.м. хэмжээ ябуулгануудые түсэбэй ёһоор эмхидхэдэг. Тиихэдэ ноябрь һара соо малай шуhа абалга, боомо, эмкар үбшэнүүдые һэргылхэ тарилганууд, уушханай ханяаданай шэнжэлэлгэ г.м. хэгдэдэг. Мүнөө малай узелково дерматидаар үбдэхэгүйнь тула тарилгын хэмжээ ябуулганууд эхилээ.
Олон жэлэй туршада ажалдаа үнэн сэхээр, харюусалга ехэтэйгээр хандажа ябаһан Октябрина Цырендоржиева 2015 ондо Россиин Федерациин Хүдөө ажахын яаманай Хүндэлэлэй грамотада хүртэһэн байна. Ажалдаа иимэ хандасатай хүдөө ажахын мэргэжэлтэдэй, аргашадай, малшадай ашаар лэ Гүнэйн адуу мал ямаршье үбшэндэ нэрбэгдэнгүй, тоо толгой бүтэн, тобир тарган ондо ородог шуу. «Урдань малай угаалга болодог байгаа, мүнөө хэхэеэ болиhон. Мал аргалха талаар бүхы юумэн һайжараа, тарилгануудые саг соонь хээд лэ байгдана. Мүнөө дээрээ нютагтамнай үхэр - 4283 толгой, хонин 852 толгой болонхой. Дүрбэн КФХ ажалаа жэншэдгүй ябуулдаг», - гэжэ Гүнэйн ветеринарна участогые даагша хөөрэнэ .
Цырендоржиев Батор нүхэрынь 1958 оной, ХойтоАгын, баһал Нэршүүгэй техникум дүүргэжэ, малай аргашан болоһон. Октябрина нүхэртэеэ бүхэли наһаяа суг ажаллаhан, мүнөө наһанай амаралтада гаранхай.
Октябрина Санжиевна наһанай нүхэртэеэ гурбан хүүгэдые хүмүүжүүлһэн. Ехэ Туяна басаганиинь Нерюнгри хотодо эмнэлгын сестрагаар ажалладаг, Бато хүбүүниинь контрактаар сэрэгэй албанда ябана, одхон Баирма басаган Могойтын аймагай Сагаан-Шулуутайн дунда һургуулида багшалдаг. Гурбан ашанартай, нэгэ зээ басагатай бшуу.
Цымжидма ДОЛГОРОВА.
