Аймагаар хаража үзэбэл...

Үнгэрэгшэ намар 23578 толгой эхэ хонин үрэжүүлэгдэһэн байна. Зарим отарануудаар хусанууд табигдаа һэн, мүн эхэ хонидто хэмэл аргаар үрэжүүлгэ ябуулагдаһан юм. Байгша ондо малшадта зуун эхэ хонинһоо ерэн хурьга абаха түсэб даабари үгтэһэн байна. Энэ болбол хори гара мянган хурьга абахаар хараа түсэб табигдана. Таряашанай-фермерскэ ажахынуудта 9885 эхэ хонин үсхэбэрилэгдэнэ. 

Март һарада Кировэй нэрэмжэтэ, «Хүһөөшэ», «Гэрэл» ажахынуудта сакман эхилээ һэн. Харин апрелиин тэн багаар диилэнхи хуби ажахынуудта харюусалгата ажал эхилхэнь. Могойтын аймагта арбан нэгэн ажахы үүлтэртэ ажахын зэргэтэй. Хамтын ба фермерскэ ажахынуудаар зоотехник, ветеринар мэргэжэлтэд ябажа, сакманай ажал харууһан дороо байлгана. Аймагай ахамад зоотехник Даши Дабаевичай тэмдэглэһээр, малшад түл абалгын харюусалгата кампани эрхимээр ябуулна. 

«Ушарбай» СПК олон жэлдэ үүлтэртэ ажахын зэргэтэй байһан аад, үнгэрэгшэ 2023 ондо нээмэл бүлгэм болонхой. Тус ажахыда түл абалга мартын тэнгээр эхилһэн байна. Могойтын аймагай ажахынууд тойрог дотор эгээл олон хонитой байна бшуу. Тойрогой Захиргаанай хүтэлбэрилэгшын уялга дүүргэгшэ Базар Дугаржапов аймагай хамтын ажахынуудай хүдөө буусануудаар тээсгэн хүрэжэ, малай үбэлжэлгын, түрэлгын кампаниин ябасануудтай танилсаһан байна. Базар Самбаевич хүдөө ажахын мэргэжэлтэдтэй «Победа», Ленинэй, Кировэй нэрэмжэтэ ажахынуудай малшадта хүрэһэн байгаа.

(Үргэлжэлэлынь 14-дэхи дугаарта).

Эрдэни ЧИМИТДОРЖИЕВ.

You have no rights to post comments