Халуун орондо ургадаг
Амарант гээшэ ямар ургамал гээшэб, ямар юумэндэ туһатайб гэжэ мэдэхэеэ Цыпыл-ма Балбаровнатай уулзаһан байнаб. Цыпылма Балбаровна залуудаа Шэтэ хотын эрдэм шэнжэлэлгын институдта мэргэжэлтэнээр ажаллахадаа, манай хизаарта ехэ үргэнөөр ургуулагдадаггүй культуранууд тушаа мэдээнүүдые суглуулдаг байһан юм. Аяар холын Африкада, Урда ба Хойто Америкэдэ ургадаг ургамалнуудаар ехэ һонирходог һэн. Бразили, Аргентина, Чили ба бусад гүрэнүүдтэ ургадаг амарант ургамалда анхаралаа хандуулһан байна. Цыпылма Жамбалова Ага нютагаа ерэжэ хүдэлхэдөө, амарантын үрэһэ оложо, тарижа туршаа. Тиихэдэ ургамал мүртэй абталдаагүй һэн ха. Олон жэл үнгэрһэн хойно хизаарай ба хүршэ Буряад Уласай таряашад амарант ургамал тарина гэжэ интернедтэ уншаад, дахинаа ургуулжа туршаха гэжэ шиидээ. Тиигэжэ ургамал тарижа, һайн ургаса абажа, сэдьхэлээ ханаһан байгаа. «Урда Америкэдэ бии болоһон ургамал шэрүүн уларилтай манай Агада ядамаргүй ургажа, ургаса, үрэһэ үгэнэ. Таридаг бологты!» – гэжэ зондо мэдүүлдэг болоо. Тэрэ гэһээр фермернүүдтэй, эмхи зургаануудтай, ажалша коллективүүдтэй, оюутадтай, үмсын хамһабариин ажахынуудай хүтэлбэрилэгшэдтэй уулзалга эмхидхэдэг болоо һэн.
Губернатор ама хүрэжэ үзэһэн
Ага тосхондо жэл бүри үн-гэргэгдэдэг хүдөө ажахын болон буйлуулан болбосоруулгын һайндэрэй хэмжээндэ эдеэ хоолой үзэсхэлэн дэлгээгдэдэг заншалтай. Тэндэ фермер Цыпылма Жамбалова амарантын талхаар буйлуулһан эдеэ хоол табидаг. Хизаарай амбан захирагша Александр Осипов үзэсхэлэндэ Цыпылма Жамбаловагай үйлэдбэриин хоол хараад, һонирхоһон, эдеэ хоолой зарим зүйлнүүдыень худалдажа абаһан байха юм. Тиихэдэ Цыпылма абгай амбан захирагшада: «Манай бууса ерэжэ хараарайгты. Амарант гээшэ ямар ургамал бэ, мэдэхэт!» – гэжэ хэлэһэн байгаа. Александр Михайлович тии-хэдэ Цыпылма Жамбалова тухай дуулаһан, «Женщина в АПК» мүрысөөнэй илагша болоһыень мэдэхэ байшоо.
«Шэтэ-Забайкальск» федеральна харгыгаар Ага тос-хонһоо зүүн тээшээ ошоходо, холо бэшэхэнэ янза бүриин ургамалнуудаар баян ажахые Цыпылма Балбаровна олон жэлдэ ударидана. Поли дээгүүр хапууста, хартаабхын хажуугаар аминдаа таригдаһан ургамал олоной һонирхол заатагүй татадаг. Хүнэй үн-дэртэй адли шахуу ногоон ургамал намарай һалхинда урагша хойшоо найгалзажа байдаг. Энэ болбол амарант ургамал болоно.
