Ажалаар хүдэржэһэн басаган

   «Эрдэм мэдэсэ абалгадам, олон үетэндэмнишье залуур болоһон багшанар гэхэдэ, Агын дунда һургуулиин захирал Намсарай Бадмажабэ, багша ба уран зохёолшо Жамьян Балданжабон, Агын багшанарай училищиин захирал Борис Лига болоно. Тэдэ маанадта «Һургуули – эрдэм ухаанай гуламта. Багша – хүнэй оюун ухаанай залуур» гэжэ заадаг һэн. Юһэн захиралнуудтай суг хүдэлһэнби. Багшын ажалда 47 жэл зорюулааб. Ород хэлэ ба литература заахадаа, 15 үе шахуу залуушуулые үргэн замда гаргааб. Шабинартаа ород хэлэнэй ба литературын бата бэхи мэдэсэ үгэхые оролдооб. Ажабайдалай бэрхэшээлнүүдые дабалгадам туһалдаг байһан багшанарта ехэ баяртайб», - гэжэ Мария Гажитовна бэшэһэн байдаг.

   Багша мүнөө жэлэй Һүүлшын хонхын һайндэртэ немец драматург Фридрих Шиллерэй «Перчатка» гэжэ баллада сээжээр уншажа, олон хүниие гайхуулһан юм. Иимэ һонор, хадууса һайтай байгаал даа.

   Мария Гажитова 1936 ондо Үбэр Аргалида түрэһэн юм. Ганса эжынь – Хандама Жамсаранова басагаяа эжынгээ абгайда, хуряахайндаа үргэжэ үгэһэн. Мария басаган Доржиев Гажит хуряахайнгаа нэрэдэ орожо, нэрыень дээгүүр нэрлүүлхэ хуби заяатай байгаа. Эсэгэ ороноо хамгаалгын Агууехэ дайнай эхилхэдэ, үүринэртэеэ Мария басаган бригадада үбһэ сабшадаг, морин тэргээр үбһэ шэрэдэг, веялкээр таряа сэбэрлэдэг, гадна полевой станда учётчица ябаһан. Тиигэжэ ажал дээрэ хүдэржэһөөр үндыгөө. 1954 ондо Агын 1-дэхи дунда һургуули дүүргэһэн. Номдоо бэрхэ басаган Томскын политехническэ институдай физикын ба тоо бодолгын факультедтэ гол предмедүүдээр «5» сэгнэлтээр шалгалта баряад, һуража байһанаа, гэр бүлын шалтагаанаар һуралсалаа орхёо һэн. Һүүлээрнь Агын багшанарай училищи дүүргэжэ, эхин шатын ангинуудай багша болоо.

   (Үргэлжэлэлынь 51-дэхи дугаарта уншахада болохо).

   Нордоп БАБУЕВА.

You have no rights to post comments