Тэрэнэй оройдоол 7 наһатай байхада, абань наһа баража, хойшонхи жэлнүүдтэ эжытэеэ сугтаа энэ дэлхэйн үлэсхэлэн байдал, даараха зүдэрхые үзэһэниинь эли. Хүндэ хүшэр байдалай шалтагаанаар һургуулишье хэхэ арга олоогүй. Гэбэшье эдир Жалсарай нютагай үбгэд хүгшэдэй аша туһаар хуушан монгол бэшэг шудалжа, саарһан дээрэ нэрээ, саһан дээрэ мүрөө үлөөхэ аргатай болоһон байна. Тиигэжэ 1925 он болотор тэрэ элдэб ажал хэжэ, хоолойгоо тэжээгээ. 1927 онһоо Агын аймагай Адуун-Шулуунай совхоздо харуулшанаар, энэл аймагай дотоодын таһагта хэрэг хүтэлэгшэ бэшээшээр ажалайнгаа намтар үргэлжэлүүлээ. Удаань Агын тойрогой гүйсэдхэхы хорооной кресткомой инструктораар ажаллаа.
1931 оной эсэстэ 24 наһатай залуу хүбүүн милициин албанда участково уполномоченноор дэбжүүлэгдээ. Тэрэ үедэ Ага нютагтамнай ангиин тэмсэлэй түлэг үе байгаа. Тиимэһээ зүблэлтэ засагай эрхэ байдал хамгаалхаар тангаригаа үгэһэн Жалсарай Батуев тэмсэлэй гүн соогуур албаяа дүүргэжэ ябаа гэхэдэ, алдуу болохогүй.
(Үргэлжэлэлынь 2-дохи дугаарта уншахада болохо).
Батожаргал ГАРМАЖАПОВ.
