Энэшье удаа заншалта ёһоор, Пробный, Жэгдэ Хээрэ (Душман), Дуянба, Ута Ягаан Боро, Алтан Шагай, Победа Хула, Спринтерский, Золотая миля, Орлика г.м. суута хүлэгүүдэй шангууд тогтоогдоһон байна. Мүрысөөнэй дүнгүүдээр, мэдээжэ моришод Константин Ишенинэй, Саян Дамдиновай, Түмэн Жамбалдоржиевай, Цокто Бадмаевай, «Аргал» нээмэл бүлгэмэй, «Победа», Кировэй нэрэмжэтэ ажахынуудай гүйгөөшэд олон зайнуудта урдалһан байна. Агын тойрогой тогтооһон «Ехэ шанда» хүртэхын түлөө Үбэр Байгалай хизаарта түрэһэн гурба наһатай гунан 10 морид 2000 метр зайда урилдаа. Эндэ Ага тосхоной К.Ишенинэй Мэри куин гэжэ зээрдэ морин (шодоогынь Сергей Старицын) олон моридые ахижа, фиништэ түрүүлэн ерээ. Зээрдэ мориндо нэмэргэ үмэдхүүлэгдээ, шодоогтонь кубок ба мүнгэн шан барюулагдаа. Мэрин Куинда ахигдаһан баһал К.Ишенинэй Переяслава гэһэн хээр морин (шодоогынь М.Цыбекжапов), «Победа» ажахын зээрдэ Фейрвакс, (шодоогынь С. Биликтуев) гэгшэд 2-дохи, 3-дахи һууринуудые эзэлээ.
Эрдэни ЧИМИТДОРЖИЕВ.
