«Алтаргана» үнгэргэхын тула июнь һара соо олоной хабаадалгатай үйлэ хэрэгүүдтэ үбшэн һэргылгын бүхы хэмжээнүүдые абахань шухала. Гараа угааха, баг зүүхэ, бэе бэеһээ холохон байха гэхэ мэтэ эрилтэнүүдые хэншье болигоогүй. Мүнөөшье суглаанда ерэһэн толгойлогшонор багуудые зүүһэн, нэгэ һуури алгадаад, холо холо һуугаа.
Эгээл мүнөө юундэ эдэ эрилтэнүүд шангалагданаб гэхэдэ, коронавирусаар зон үбдэһөөр, Агада долоон хоног бүри 5-6 хүн үбдэнэ бшуу. «Алтарганын» болоходо, бүхы хабаадагшад, харагшад коронавирус һэргылхэ тарилга абаһан байха ёһотой. Харин мүнөөдэрэй байдалаар, тойрогой ажаһуугшадай 51 лэ хубинь тарилга абаад байна гэжэ тойрогой хүтэлбэрилэгшын орлогшо Билигма Будаева мэдээсэбэ. Коронавирусаар үбдэһэн зон 6 һара болоод тарилга абаха, харин хүнгэнөөр үбдэһэн зоной 3 һара болоодшье тарюулхада болохо байна. Энэ болзорһоо халта урид тарюулбал, бэе махабадта муу байхагүй гэжэ хэлэгдэбэ.
Мүнөө хүн бүхэнэй хэзээ энэ тарилга абахамниб гэжэ түсэблэжэ, тэдыдэ тарюулхаяа ошохоб гэжэ «Лист ожидания» гээд нэрлэгдэһэн бүридхэлдэ орохонь шухала. Энэ бүридхэлдэ хэды хүн ороноб, тэдыл вакцина ерэнэ ха юм. Тиимэһээ хүн бүхэнэй энэ тарилгада хандасаһаа коронавирус үбшэн «ургалагдаха» гү, али дуран соогоол дэлгэржэ байха гү гэжэ дулдыдана.
Дарима БАЗАРОВА.
