Иимэ Ага нютагай айлшадта, аяншалагшадта гар дороо абаад ябахаар зохид газаршалагшые зохёоһон бүгэдэ зондо, тэрэ тоодо Агын 1-дэхи дунда һургуулиин зурагай багша, фотограф, хэблэл бүридхэгшэ редактор Дарима Цыбеновада Агын тойрогой Захиргаанай хүтэлбэрилэгшэ Буянто Батомункуев ехэ баярые хүргөө.
Хэблэл 255 нюуртай, хоёр хэһэгһээ бүридэнхэй. Нэгэдэхи соонь аяншалгын замууд тодорхойлоотой, тойрогой нютаг бүхэндэ ямар һонин, дурасхаалта газарнууд бииб гэжэ бэшээтэй. Хоёрдохи соонь тойрогой дэбисхэр дээрэ болодог заншалта үйлэ хэрэгүүдэй литэ һара һараар үгтэнхэй.

Хэблэлэй гадар.
Хэблэлтэй танилсуулгын хэмжээндэ Агын аяншалгын һалбариин мүнөөдэрэй байдал тухай элидхэгдээ. Коронавирус үбшэнэй тахалай буурахада, Агын аяншалгын газарнууд нэгэ доро 730 амарагшадые угтан абаха аргатай байха гэжэ мэдээсэгдэбэ. Аяншалгын зам бүхэн өөр өөрын гидтэй, 10 хүн гидэй тусхай саарһатай болоһон байна, харин 5 хүн аяншалгын зам эмхидхэгшын үнэмшэлгэтэй болонхой.
Дарима БАЗАРОВА.
