Бүхэроссиин «Семья года» конкурсын региональна шатын дүнгүүдээр, Амидхааша нютагай ажаһуугша Баир Баясхалановай бүлэ «Семья - хранитель традиции» янзада илаа юм.
Мүнөө жэл тус конкурсдо Үбэр Байгалай хизаарай 20 аймагһаа 28 бүлэнэр хабаадаа. Баир ба Цындыма Баясхалановтанай бүлэ тойрог дотороо мэдээжэ, хүндэтэй бүлэ юм. Баир Баясхаланов олон жэлдэ багшаар хүдэлһэн. Гэрэй эзэн гартаа дүйтэй, түмэршэ, модошо дархан хүн юм. Һур харбаха, шатар наадаха дуратай. Үшөө шүлэг уранаар зохёодог, хошон хѳѳрѳѳнүүдые бэшэдэг, ородһоо буряад хэлэндэ оршуулхадаа бэрхэ. Үбэр Байгалай хизаарай габьяата муниципальна албатан, ажалай ветеран Цындыма Нордоповна нүхэртэеэ дүрбэн хүүгэдые хүмүүжүүлээ.
Жигжит хүбүүниинь мэдээжэ түмэршэ нарин дархан, Россиин Уран дархашуулай холбооной болон Италиин Дархашуулай гильдиин гэшүүн, «Творческая мастерская Баясхаланова» эмхиин генеральна директор юм. Мүнөө Жигжит Баясхалановай бренд Агын Буряадай тойрогой үндэһэн соёлой хаһагдашагүй хубинь болонхой. Тэрэ хутага үйлэдбэрилдэг. Тэрэ ганса түмэрѳѳр дархалдаг бэшэ, гэрэй заншалта хэрэгсэлнүүдые, гоёлой зүүдхэлнүүдые урладаг юм.
«Мэдээжэ бүлэ урдаа олон түлэблэлнүүдтэй, ялас гэмэ илалтануудтай болон амжалтануудтай юм. Жигжит Баясхалановай зохёохы хүсэлнүүдээ бэелүүлгэдэ бүлын заншал бага бэшэ нүлөө үзүүлнэ гэжэ этигэнэб», - гэжэ Агын Буряадай тойрогой Захиргаанай хүтэлбэрилэгшэ Буянто Батомункуев тэмдэглээ.
Баясхалановтанай бүлэ ноябрь һарада Москва хотодо үнгэргэгдэхэ конкурсын бүхэроссиин шатада хабаадаха юм.
Нордоп БАБУЕВА.
