Тус хүшөө бодхоохо хэрэгтэ «Боевое братство» эмхиин гэшүүдэй дэмжэлтэ, «Вечная память героям-воинам России» гэһэн социальна түлэблэлэй грантын 50 мянган түхэриг ехэ түлхисэ боложо үгөө. Мүн тойрогой, гурбан аймагай, Ага тосхоной захиргаанууд, РОСТО ДОСААФ, «Ипотечное жилищное кредитование» нээмэл бүлгэм, тойрогой сэрэгэй комиссариат дэмжэлтэ үзүүлээ һэн. Россиин хүндэтэ архитектор, тойрогой габьяата барилгашан Болот Дондоковой зохёоһон түһөө түсэбөөр Хойто-Кавказай, Афганистанай хаданууд, «Боевое братство» эмхиин бэлгэ тэмдэг, Улаан Одоной, Эрэлхэг зоригой орденууд хүшөө дээрэ зураатай. Дайнай ветеранууд Түмэн Санданов ба Владимир Чимитцыренов гэгшэд дурасхаалай хүшөө нээгээ. Агын 2-дохи дунда һургуулиин һурагшад хүшөөдэ гүрлөө сэсэг табяа. «Зарница» хүшөөгэй дэбисхэр дээрэ сэрэгэй-патриотическа хэмжээ ябуулганууд эмхидхэгдэдэг, энэ талмайһаа залуу хүбүүд сэрэгэй албанда мордодог байха гэжэ хэлэгдээ. 

   Эрдэни ЧИМИТДОРЖИЕВ.

You have no rights to post comments