Дүрбэн жэлэй нэгэ удаа үнгэргэгдэдэг дэлхэйн ехэ нааданда манай тамиршад үндэр амжалтануудые туйлаагүйшье һаа, ехэ дүршэл абаа. Нютагай тамиршадай Токиодо хабаадажа байхадань, ажаһуугшаднай һанаата боложо, баяртай мэдээсэл дуулгахыень хүлеэжэ байгаа. Мүрысөөнэй дүнгөөр, Бато Цыдендоржиев эрхим 16 харбаашадай тоодо ороо һэн. Тойрогой Захиргаанай хүтэлбэрилэгшэ Буянто Батомункуев тамиршадтай ба һоригшодтойнь уулзалга эмхидхээ. Тамиршад мүрысөөн тушаа хѳѳрѳѳд, саашанхи түсэбүүдтэеэ хубаалдаа. «Ехэ мүрысөөндэ Росси гүрэниие түлөөлжэ хабаадахада, омогорхолтой ба сэдьхэл хүдэлгэмэшье байгаа. Һайнаар һорилго хэжэ, 2024 ондо үнгэргэгдэхэ Олимпиин ба Паралимпиин наадануудта эрхимээр хабаадахабди гэжэ найданабди», - гэжэ тамиршад хэлээ. Россиин габьяата һоригшо Балта Цынгуевай тэмдэглэһээр, Урда Солонгосой һуршад түрүү зэргэдэ ябана. Бэшэ гүрэнүүдэй тамиршадта найдал үлөөнэгүй. Тэдэниие булихын тула нэтэрүү һорилго хэхэ хэрэгтэй. Уулзалгын үедэ тойрогто һур харбалгын хүгжэлтэ тушаа дэлгэрэнгы хөөрэлдөөн болоо. Тойрогой Захиргаанай хүтэлбэрилэгшэ Буянто Батомункуев уулзалгын түгэсхэлдэ тамиршадта ба һоригшодтонь баярай бэшэгүүдые ба бэлэгүүдые барюулаа.

   Д.ЧИМИТОВ.

You have no rights to post comments