Агын Буряадай тойрогой Захиргаанда мартын 19-дэ болоһон «Бурятская национальная борьба «Бүхэ барилдаан» как фактор этнической идентичности народа» гэһэн регионууд хоорондын эрдэмэй-дүршэл абалгын конференцидэ сенатор, хизаарай дүрэ буляалдаата барилдаанай федерациин хүндэтэ юрэнхылэгшэ Баир Жамсуев, хизаарай амбан захирагшын орлогшо Аягма Ванчикова, Буряад ороной, Үбэр Байгалай хизаарай, Эрхүүгэй можын тамирай сайдууд, барилдаанай федерацинуудай түлөөлэгшэд, һоригшод, тамирай ветеранууд хабаадаа.
Гол хөөрэлдөөн гэхэдэ, бүхэ барилдаа нэгэ дүримтэй болгохо талаар һанамжанууд шагнагдаа, дурадхалнууд оруулагдаа. 2005 ондо Алхана уулын үбэртэ үнгэргэгдэһэн конференцидэ абтаһан дүримүүдые шэнээр баталха тухай хэлсэбэ. Буряад барилдаагаар мүрысөөнүүдые гурбан нютаг орон өөр өөрын һанаһан дүримөөр үнгэргэнэ. Энээниие болюулжа, эбээрээ зүбшэжэ, нэгэ дүримтэй болгохо хэрэгтэй. Агада, Буряад орондо тамирай талаар ажал ябуулдаг мэргэжэлтэд һанамжануудтаяа хубаалдаа, эрхүүгэйхид онлайнаар элидхэлнүүдые хээ. Мүнөө зун Агада үнгэргэгдэхэ «Алтаргана» наадан болотор барилдаа нэгэ дүримтэй болгохо гэжэ шиидхэгдэбэ. Конференциин түгэсхэлдэ гурбан регионой тамирай сайдууд барилдаа хүгжөөхэ талаар хэлсээ баталаа.
Э.ДОРЖИЕВ.
