Агын аймагай захиргаанай байшан соо мэдээжэ шатарай багша, һоригшо Александр Долсоновто ноутбук бэлэг болгон барюулагдаа.
Александр Долсонов олон жэлэй туршада эдир үетэниие шатар наадажа һургажа байһан, энэ ажалда бэеэ сүм зорюулһан багша юм. Хэдэн бэрхэ шатаршадые бэлдэжэ, тамирай үргэн замда гаргаһан гээшэ.
Россида, Европодо, дэлхэйдэ мэдээжэ болоһон шатаршад багшынгаа нэрэ дээгүүр нэрлүүлжэ ябана. Бэлигтэй һоригшын омогорхол – Яна Жапова шабинарайнь дунда онсо һуури эзэлнэ. Тэрэ Европын абарга, уласхоорондын, дэлхэйн шангуудта хүртэһэн, эхэнэрнүүдэй хоорондо уласхоорондын гроссмейстерэй нэрэ зэргэтэй.
Агын аймагай захиргаан А.Долсоновой шабинартаяа холо ойрын мүрысөөнүүдтэ ябахада, ходол дэмжэжэ байдаг. Энэ удаа мүнөөнэй оньһон түхеэрэлтэ – ноутбук бэлэглэһэн байна. Агын мяханай комбинат (захиралынь - Данил Алажинов) 160 мянган түхэригөөр ноутбук абаа бшуу. Ноутбугыень һоригшо хэшээлдээ хэрэглэжэ, шабинартаа улам һайн мэдэсэ үгэхэ аргатай болобо.
Тус аймагай захиргаанай толгойлогшо Жаргал Жаповай хэлэһээр, мяханай комбинадай хүтэлбэри өөрын дураар меценат боложо, тойрогой, тосхоной эмхи зургаануудта мүнгөөр, эдеэ хоолоор туһалдаг гээшэ. Эндэ һая Донбассай ажаһуугшадта гуманитарна 10 хайрсаг тушёнко, мяханай зүйлнүүдые эльгээһэн байна. Һүүлэй үеын үнэ сэнгүүдэй бодоодүй байхада, ноутбук үрдижэ абаһан байха юм. Мүнөө һайн ноутбугай сэн 250 түхэригтэ хүрэнэ гэжэ хэлэгдээ.
Харюудань һоригшо Александр Долсонов баярай үгэ хэлэжэ, сэнтэй бэлэгээ һайнаар ба удаан хэрэглэхэ тухайгаа мэдүүлнэ һэн.
Э.ДОРЖИЕВ.
