Мүнөөдэр, апрелиин 12-то, манай гүрэн дотор Космонавтикын үдэр тэмдэглэгдэдэг. Замбуулинаар ниидэжэ, дэлхэй хаража ерэһэн түрүүшын космонавтнууд тухай  мэдээсэлнүүдые "Толон" һониной "Барбаадай" нюурта дурадханабди. 

ТҮРҮҮШЫН КОСМОНАВТ

1961 ондо «Байконур» гэжэ нэрэтэй замбуулинай станциһаа түрүүшын космонавт Юрий Гагарин «Восток» онгосоор замбуулинаар ниидэһэн. Тэндэ 108 минутын туршада байһанай удаа апрелиин 12-то Саратовска можын «Ленинградский путь» колхозой хээрэ газар дээрэ бууһан юм. Энэ баатаршалга гаргаһанайнь түлөө Юрий Гагаринда Советскэ Союзай Геройн нэрэ зэргэ олгогдоһон. 1962 онһоо эхилээд, апрелиин 12-то Космонавтикын үдэр тэмдэглэгдэдэг болоһон. 

ТҮРҮҮШЫН ЭХЭНЭР-КОСМОНАВТ

Валентина Терешкова - эгээл түрүүшын эхэнэр-космонавт. 1963 оной июниин 16-да «Восток-6» гэһэн онгосоор замбуулинаар ниидэжэ, 72 сагай туршада 48 дахин Дэлхэй тойроһон.
Замбуулинаар ниидэхэ үдэрѳѳ Валентина Терешкова гэртэхиндээ парашюдай һорилгын мүрысѳѳндэ ошоноб гэжэ хэлэһэн ха. Тэрэнэй замбуулин түби хаража ерэһэн тухай гэртэхиниинь радио-дамжуулгаар дуулаһан юм.

ТОН ТҮРҮҮН ОНГОСОҺОО ЗАМБУУЛИН РУУ ГАРАГША

1965 оной мартын 18-да космонавт Алексей Леонов  хүн түрэлтэнһөө эгээл түрүүн үшөө шэнжэлэгдээгүй замбуулинай дайда руу онгосоһоо гаража, 12 минута тухай замбуулин түбидэ  байһан.

ҺАРА ДЭЭРЭ БУУҺАН КОСМОНАВТ

1969 оной июлиин 21-дэ Америкын Холбоото  Штадуудай эрхэтэн Нейл Армстронг «Аполлон-11» гэһэн онгосоор Һара дээрэ бууһан. Тэндэ 2 хахад сагай туршада Һара шэнжэлээ.

МОНГОЛ ОРОНОЙ ТҮРҮҮШЫН КОСМОНАВТ

 

Ж.Гуррагча.

 

 

1947 оной декабриин 5-да Монголой Булган аймагай Гурбан-Булаг нютагта ерээдүйн космонавт Жугдэрдэмидийн Гуррагча түрэһэн.
1971 ондо Советскэ Союзай авиационно мэргэжэлэй һургуулида эльгээгдэһэн. 1977 ондо Н.Е.Жуковскиин нэрэмжэтэ агаарай-инженернэ сэрэгэй академи дүүргээ. 1978 ондо Гуррагча «Интеркосмос» гэһэн түһѳѳ түсэбэй хэмжээндэ Советскэ Союз ерэһэн. 1981 оной мартын 22-30-да «Союз-39» гэһэн онгосоор замбуулинаар ниидэһэн. Тиихэдээ засаг зургаанай тусхай ашаа: Монгол Уласай туг, Гүрэнэй үндэһэн хуулиин үгэнүүдые, Сүхэ-Баторай дүрэ, удаадахи үеынхидтээ захяа бэшэгтэй хуй болон 16-дахи зуун жэлдэ монгол эрдэмтэдэй зохёоһон одо мүшэтэ тэнгэриин зураг абаашаһан. 
Жугдэрдэмидийн Гуррагча Советскэ Союзай Геройн нэрэ зэргэтэй, Ленинэй ордентой, бэшэшье гүрэнүүдэй олон шангуудтай. 2000-2004 онуудта Монголой хамгаалгын министр байгаа. Мүнөө тэрэ Россиин-монголой эб найрамдалай бүлгэмэй түрүүлэгшэ. 

Валентина ЦЫРЕНЖАПОВА.

You have no rights to post comments