Апрелиин 14-дэ Агын хүүгэдэй уран урлалай байшан соо тойрогой олон хүүгэдтэй бүлэнэрэй «Мы вместе» гэһэн форум үнгэргэгдөө. 

Форумой зорилгонууд гэхэдэ, зүб мүрөөр хүүгэдээ хүмүүжүүлһэн, али хүмүүжүүлжэ байһан, гэр бүлын ёһо заншалнуудые сахидаг бүлэнэрые элирүүлгэ ба хүндэлэн ёһололго, гэр бүлын баялиг дэлгэрүүлгэ ба тэдэниие дэмжэхэ социальна хэмжээнүүдые һайжаруулга болоно. Агын тойрогто 2964 бүлэ олон хүүгэдтэй. Форумдо тойрогой ба Ага тосхоной 80 гаран бүлэ хабаадаа.
«Наһатай болоһон хойноо олохон хүн «бүхы юумэн һайн, хэрбээ олон аха дүүнэртэй, түрэлхидтэй һаа, ямар гоё һэм!» гэдэг. Хүдэр, олон хүүгэдтэй, эбтэй гэр бүлэнэрые байгуулжа, тэдээндээ элинсэгэйнгээ баялиг дамжуулжа ябаябди. Бидэ арга шадалаараа туһа хүргэхэбди», - гэжэ Үбэр Байгалай хизаарай амбан захирагша Александр Осипов хэлээ.
Форумой түрүүшын шатада конкурс 5 янзаар үнгэргэгдөө юм. Баярай оршон байдалда Александр Осипов, Агын Буряадай тойрогой Захиргаанай хүтэлбэрилэгшэ Буянто Батомункуев, хизаарай Хуули байгуулгын Суглаанай түрүүлэгшын орлогшо Цырен Цыренов, Россиин Ажалай Баатар Далай Гунгаев, Бээжэн хотодо Олимпиин наадануудай хүрэл медальда хүртэгшэ Базар Базаргуруев гэгшэд конкурсын илагшадта диплом болон мүнгэн шангуудые барюулаа.
«Трудовая династия» янзада Очир ба Дарима Долсоновтон, «Спортивная семья» - Чингис ба Сэржена Ямадаевтан, «Семейный отдых» - Андрей ба Александра Леонтьевтон, «Мы и наш дом» - Александр ба Екатерина Широкихтон, «О Великой Победе в моей семье» янзада Саян ба Ирина Ганжиповтан гран-при абаа бшуу.
Агын аймагай ЗАГС-ын таһагые даагша Евгения Балданова коллективэйнгээ зүгһөө эгээ олон хүүгэдтэй Андрей ба Александра Леонтьевтондо бэлэг барюулба.
Форумой хэмжээндэ «Мировое кафе» гэһэн хэшээл психолого-педагогическа, эмнэлгын ба социальна туһаламжын «Семья» гэһэн хизаарай түб үнгэргөө. Хабаадагшад хизаарай психолого-педагогическа туһаламжын «Доверие» болон Агын «Ариадна» эмхинүүдэй, Пенсионно жасын, Агын ажаһуугшадые социальна талаар хамгаалгын түбэй, Агын ЗАГС-ын мэргэжэлтэдһээ болон Агын тойрогой больницын хүүгэдэй эмшэдһээ зүбшэлнүүдые абаха аргатай байгаа. Агын хүүгэдэй уран урлалай байшанай багшанар мастер-классуудые үнгэргөө. Түгэсхэлдэнь «Баяр» ансамблиин хүмүүжэмэлнүүд, Агын соёлой байшанай артистнар концерт-наадаар олониие баярлуулаа.

Нордоп БАБУЕВА.

You have no rights to post comments