Эндэ һая тойрогой столой теннисэй хүгжэлтэдэ зорюулагдаһан «Укротители белой молнии» гэһэн номтой танилсуулга тойрогой Захиргаан соо үнгэргэдөө.
Ном дотор тамирай туйлалтанууд, мэдээжэ тамиршадай фото-зурагууд, түүхэ ба мүнөө үеын байдал тухай баримтанууд ороһон байна.
Номой «нара хараха» хэрэгтэ тойрогой столой теннисэй федерациин юрэнхылэгшэ Баир Дугаров ехэ хубитаяа оруулаа. Тэрэ мүнгэ һомолжо, Эрхүү хотын «Репроцентр+» эмхидэ 500 хэһэгээр хэблүүлжэ гаргаһан байна.
Номой автор тойрогой мэдээжэ уран зохёолшо, поэт Батожаргал Гармажапов үгэ абахадаа, тамирай түүхэ дээрэ тогтоо. Манай тойрогто столой теннисэй хүгжэлтэ Юндунов Бадмажаб гэжэ хүнэй нэрэтэй сэхэ холбоотой юм. Тэрэ өөрынгөө аша оролдолгоор Зугаалай нютагай hургуулиин hурагшадые столой теннистэ эльгэлүүлһэн. Тэрэл 1960 ондо Д.Батоев, Д-Ж.Раднаев, Д.Дабаев гурбан Шэтын можын хүдөөгэй тамиршадай мүрысөөндэ наадажа оройлоо. Тамиршад Добчин Батоев ба Сэсэг Галданова хоёр Новосибирск хотодо үнгэргэгдэhэн спартакиадада амжалта туйлаhан байна.
Хэмжээ ябуулгада тамирай ветеранууд, тамиршад, ниитэ ажаябуулагшад хабаадаа. Тойрогой Захиргаанай хүтэлбэрилэгшын орлогшо Билигма Будаева номой «нара хараха» хэрэгтэ хубитаяа оруулһан зондо баярые хүргэжэ, хүндэлэлэй грамотануудые барюулаа.
Э.ДОРЖИЕВ.
