Байгша ондо Yбэр Байгалай хизаарай харгын жасын субсидиин ашаар «Угсаахай» профилактори руу ошодог харгын заһабарилга түгэсэхэ юм. Подрядчик дээшээ гарадаг харгын эгсэ газарта аюулгүй байхын тула 15 мянган кубометрһээ үлүү шорой малтажа гаргаа, харгы 1,8 метр доро болгогдоо, асфальтаар хушагдахаар бэлэн.
   Ананда Дондоков барилгын ажал октябриин 1 болотор дүүргэхыень даабари үгөө.
   «Угсаахай» профилакторидо Ананда Цыдыпович «Родина» үүлтэртэ ажахын түрүүлэгшэ Дарима Дондоковатай уулзалга үнгэргөө. Дулдаргын аймагай түрүү ажахын саашанхи ажал тухай хэлсээ. «Родина» ажахы агын үүлтэрэй хонидые үсхэбэрилдэг.
   Уулзалгын дүнгүүдээр, Ананда Цыдыпович Дулдаргын муниципальна тойрогой захиргаанай толгойлогшо Дамдин Мижитдоржиевта ба Агын Буряадай тойрогой Захиргаанай хүтэлбэрилэгшын орлогшо, агропромышленна комплексын таһагай дарга Жаргалма Жаргаловада тус ажахын ажаябуулгые нягтаар шэнжэлжэ, хүгжөөхэ талаар дурадхалнуудые бэлдэхэ даабари үгөө.
   «Угсаахай» профилакториин ерээдүйн хүгжэлтэ тухай хөөрэлдөөн болоо.
   Дулдарга hууринда сэрэгэй тусхай үйлэ хэрэгтэ хабаадаһан нютагайхидта дурасхаалай хүшөө бариха ажал түгэсөө. Тус хүшөөгэй нээлгэ сентябриин 2-то үнгэргэгдөө.

You have no rights to post comments