- Цыцыгма Цыдыповна, та Буянта һара соо буянтай ажал үүсхэнэт. Сагаан Дара эхын 1000 дүрсэ бүтээхэ гэһэн һанал тухайгаа хөөрөөд үгыт.

- 2019 ондо Энэдхэгэй баруун зүгтэ оршодог Карнатака штадта Мундгода хотын Дрепунг Гоман дасанда Далай лама юрын ажаһуугшадта ном табижа айладхаа бэлэй. Тэрээндэ хүртэхэеэ ошоо һэм. Тэндэ ябахадаа, һүр жабхалантай дасан дугануудые хаража һайхашаагааб. Дасан бүхэндэ 1000 бурханай дүрсэнүүд ямаршье гоё байгааб. Тэдэниие хараад, нютагайнгаа дасанда Отошо бурханай 1000 дүрсэ бүтээхэ һанал түрөө һэн. Далай багшаһаа номдо хүртэхэдөө, буддын шажанай гүн ухаанай һургаал тухайлхатай болооб.

Һанаһан хүсэлөө бэелүүлхэ талаар бодомжолхоб, тиихэдээ Сүүгэлэй дасанда Зонхобо бурханай 1000 дүрсэ худалдажа абаһыень һанаад, тэрээн шэнгеэр баһал тиигэхэ байгаа гү гэжэ бодооб. Нёдондо Зугаалайнгаа дасанай шэрээтэ Батор ламхайтай уулзажа, һанаһан хэрэгээ хэлэхэдэм: «Болохол даа. Мүнөө жэл бэшэ, шэнэ жэлһээ эхилэе», - гэжэ дурадхаа бэлэй. Энэл жэлынь Санкт-Петербургын уран барималшатай Янгаажан дасанда ажал хээ һэмди. Ажалай үедэ энэ дасанай шэрээтэ Буда ламхайда һанаһан хүсэлөө дүүрэн хөөрэбэб. Буда ламхай шагнаад: «Яахаа Отошо бурханай дүрсэ хэхээ һананабта? Дара эхэдэ зорюулагдаһан ордон ганса Үбэр Байгалай хизаарта байдаг ха юм. Иимэ ехэ дасантай хадаа Дара эхын дүрсэ бүтээгты. Ямар гоё байхаб, дасан ороһон хүн 1000 Сагаан Дара эхэһээ адиста хүртэхэ! Ута наһа наһалха, жаргал эдлэхэ гэхэһээ эхилээд, Дара эхэ түргэн сагай туршада хүндэ туһалхые оролдодог юм». Буда ламхайн хэлэһэн үгэнүүдыень тон һайнаар шагнажа, «нээрээшье, зүб хэлэнэл даа» гэжэ бодомжолжо байгааб. «Хаанаһаа Дара эхын хэб олохо гээшэбиб?» гэжэ дам асуухадамни, «Таанадта туһалхаб. Бэдэрээд үзэхэб» гэжэ ламхай харюусаа һэн. Нэгэ хэды сагай үнгэрһэн хойно «Санкт-Петербургһаа хэб олооб» гэжэ Буда ламхайн хонходоходо, ехэтэ баярлааб. Улаан-Үдэдэ 20 гаран танил хүнүүд Дара эхын дүрсэнүүдые хэлсэжэ туһалалсаа. Бэшэ дүрсэнүүдые Буянта һара соогуур Зугаалайн дасанда хэжэ эхилээ һэмди.

- Энэ буянта ажал ябуулжа байхадаа, ямар зорилготой хүдэлөөбта?

- Минии бүхы һанал гэхэдэ, буян хуряаха арга боломжо нютагайхидтаа үгэхэ. «Олон хүнэй хабаадалгатайгаар бүтэһэн бурхан хүсэтэй байдаг» гэжэ Зугаалайн дасанай шэрээтэ хэлээ һэн. Тэрэ үгэдэнь хүрэжэ, нютагай зоноор хүүлэхэеэ оролдооб. Дасан ерэжэ, бэеэрээ хэхэ гээшэ ехэ буян. Үдэр бүхэндэ 25-48 хүн сугларжа, ажал хэдэг байгаа. Улаан-Үдэһөө, Шэтэһээ, Эрхүүһээ зон ерээ, Могойтын, Агын аймагайхидшье хэлсээ.

Энэ ажалай һүүлээр дүрсэнүүдые бүтээһэн гэрээ шэнэдхэн һэргээгээбди. Тэндэ Зугаалайн дунда һургуулиин 20-дохи выпуск мүнгэ татажа, газаа досоогүй сэбэрлээ.

Зугаалайнхид үйлэдэһэн хэрэгыем дэмжээ, хүнэй этигэл шанга байна гэжэ тэмдэглэхээр. Хамтадаа 700-һаа үсөөн бэшэ зон хабаадаа. Хэһэн ажалдаа баяртайнууд байнабди.

(Үргэлжэлэлынь 31-дэхи дугаарта уншахада болохо).

Валентина
ЦЫРЕНЖАПОВА.

You have no rights to post comments