Хуралдаан үглөөнэй арбан сагһаа баяр ёһололой нээлгээр эхилжэ, Агын Буряадай тойрогой Захиргаанай социальна хүгжэлтын таһагай дарга Розалия Балдоржиевада, Ц.Жамцараногой нэрэмжэтэ номой сангай захирал Дарима Дарижаповада, Б.Барадинай нэрэмжэтэ Ага-Хангилай дунда һургуулиин захирал Цырегма Шойроповада болон Базар Барадинай түрэлхидтэ үгэ үгтөө. Удаань Ц.Жамцараногой нэрэмжэтэ номой сангай ажалтад Базар Барадинай намтар ба тэрэнэй ажаябуулга тухай «Память сильнее времени» гэһэн видеоролик ба «Базар Барадин – выдающийся просветитель, учёный, патриот» гэһэн виртуальна үзэсхэлэн бэлдэжэ харуулба. Ага-Хангилай дунда һургуулиин багша Цыржимыдык Данцаранова «Базар Барадин – выдающийся сын бурятского народа» гэһэн элидхэл хэһэн байна. Энэ хэмжээ ябуулгын гол зорилгонууд хадаа Базар Барадинай эрдэмэй, ниитын болон гүрэнэй ажаябуулга тухай мэдэсэ үргэдхэхэ, дэлгэрүүлхэ, һургуулиин хүүгэдэй дунда эрдэм-шэнжэлэлгын ажал ябуулха, буряад хэлэ хүгжөөлгын асуудалнуудые бодхоохо.
Эрдэмэй-дүршэл абалгын хуралдаанда хоёр талмай хүдэлөө. Түрүүшын талмайда хабаадагшадай тоо эгээ олон байба. Эндэ 9-11-дэхи ангинуудай һурагшадай 15 элидхэл шагнагдаа юм. Россиин гүрэнэй эрхим муниципальна албатан, Үзөөнэй наһатайшуулай зүблэлэй түрүүлэгшэ Владимир Цыбендоржиев, арадай гэгээрэлэй эрхим, Ага-Хангилай музей даагша Лхама Балданова, Ц.Жамцараногой нэрэмжэтэ номой сангай захиралай орлогшо Баярма Балбарова гэгшэд жюриин гэшүүдээр ажаллаа. Хуралдаанай хоёрдохи талмайда 7-8-дахи ангинуудай һурагшад хабаадаба. Эндэ жюриин гэшүүдые нэрлэбэл: багшын ажалай ветеран, Базар Барадинай гуша басаган Вера Цыбендоржиева, Ц.Жамцараногой нэрэмжэтэ номой сангай мэдээсэлэй таһагай ахамад библиотекарь Дарима Базарова. Тиихэдэ тус хэмжээ ябуулгада Агын Буряадай тойрогой эмхинүүдэй түлөөлэгшэд, һургуулиин һурагшад, Базар Барадинай түрэлхид болон нютагайхид – бүхыдөө 50 гаран хүн хабаадаа, 22 элидхэл шагнагдаа юм.
(Үргэлжэлэлынь 50-дахи дугаарта уншахада болохо).
Оюна ШАГЖАЕВА.
