ЮРЭНХЫЛЭГШЫН АШААР

   Нээлгын баяр ёһололдо Ара-Элеэ нютагайхид бүгэдөөрөө хабаадаа. Энэ баяртай дашарамдуулан, хаа-хаанаһаа ерэһэн айлшад амаршалгын үгэнүүдые хэлээ.

   Ара-Элеэгэй дунда һургуулиин байшан шэнэдхэн заһабарилгада 17 сая түхэриг һомологдоһон байна. Энэ мүн-гөөр һургуулиин сонхонууд, палааха һэлгүүлэгдээ, таһалга бүхэнэй үһээ шэнэлэгдээ. Байшан түмэр сайдингаар хушагдаа. Хажуугаарнь һуралсалай эмхинүүдтэ бэелүүлэгдэдэг «Антитеррористическая защищённость» гэһэн тусхай программаар түймэрэй аюулай дохёо тодхогдоо, зайн галай утаһанууд шэнэлэгдээ, шэнэ хорёо баригдаа, һургуули газаахи гэрэлтүүлгэтэй болоо, видео-адаглалгын оньһон түхеэрэлтэ тодхогдоһон байна. Һургуулиин үүдэндэ турникет табигдаа. Эдээндэ 2 сая 300 мянга гаран түхэриг һомологдоһон. Гэхэ мэтэшэлэн нарин нягта ажалнуудай газаа досоогүй хэгдэжэ, хуушан һургуули танигдахаар бэшэ болбосон түхэлтэй болоһон тухай Ара-Элеэгэй дунда һургуулиин захирал Арюна Степанова тэмдэглэнэ.

   Һургуулиин кабинет бүхэн соо партанууд ба стулнууд, самбар гэхэ мэтэ шэнэлэгдээ, багшын, һурагшадай хэрэгсэлнүүд абтаа. Тэрээндэ 4,5 сая түхэриг гаргашалагдаһан байна.

   Танигдахаар бэшэ болоһон һургуули соо үхибүүдэй нюдэндөө галтайхан болошоод ябахые ажаглахада гоё. Дулаан, һаруул, һайн эрхэ нүхэсэлтэй һургуули соо һурагшад номоо үзэжэ, һуралсалдаа бүри оролдосотойгоор хандажа, амжалтатай байха гээд найдахаар.

   Россиин Федерациин Юрэнхылэгшын ашаар Алас Дурнын федеральна тойрогто «Единая субсидия» гэһэн түлэблэл бэелүүлэгдэнэ. Энэ түлэблэлөөр ара-элеэгэйхид дулаан, һаруул, ажалаа һаадгүй хэхээр соёлой байшантай болоо. Соёлой модульно байшанда мүнөөнэй түрүү технологи хэрэглэгдээ, шэнэ материалнуудаар бодхоогдоо. Энээндэ 30 сая түхэриг һомологдоһон тухай соёлой байшаниие даагша Людмила Пятых хэлэнэ. Байшанай газаа, досоо харахада урматай даа. Бүхы юумэн шэнэ. Талмайгаараа томо фойе, харагшадай танхим һүрөөтэй. Байшан соохи таһагууд бодолтойгоор хэгдэһэн. Тайзан дээрэ гарахынгаа урда тээ бэеэ һэргээхэ, бэлдэхэ таһагууд байна. Мүн ханадаа гэрэлтэй хатарай таһагтай болоһониинь бүришье гайхалтай.

   Шэб шэнэхэн томо тайзан дээрэ Ара-Элеэгэй ажаһуугшад урматайгаар, дуратайгаар, үнэн зүрхэнһөө үхибүүдтэеэ концерт-наада айлшадта харуулаа һэн. Хүүгэд «Пусть всегда будет солнце» гэһэн дуу ород, буряад хэлэн дээрэ гүйсэдхэжэ, харагшадай һайшаалда хүртөө.

   ДОМОГООР БАЯН АРА-ЭЛЕЭ

   Соёлой байшанай нэгэ таһагта номой сан ажалаа ябуулна. Номой сангай таһаг соо аятай зохид, шэнэ бараан, компьютер – хамаг юумэн хуу зохёогдонхой. Энэ жэлэй сентябрьһаа номой сангые даагшаар Марина Фирсова хүдэлнэ. Марина Евгеньевна номой санда хүдэлхэһөө гадна музейн ажал ябуулдаг. Тэрэ нютагайнгаа домог ба түүхэтэй тодорхойгоор танилсуулаа.

   (Үргэлжэлэлынь 51-дэхи дугаарта уншахада болохо).

    Валентина ЦЫРЕНЖАПОВА.

You have no rights to post comments