Гэр бүлэ энэ дэлхэй дээрэ юунһээшье сэнтэй юм. Гэр бүлэ юртэмсын нэгэ «уурхай» болоно, тэндэ жаргал, баяр, этигэл, найдал, энхэрэл бии. Ямаршье гэр бүлын хамгаалагша, түшэг тулга бүһэтэй хүн болодог. Гэрэй эзэн эхэнэр гуламтаяа сахидаг. Буряад угсаата араднай үри хүүгэдээ багаһаань һургажа, хүмүүжүүлжэ, хүнэй зэргэдэ гаргадаг гээшэ. Хүүгэд аба эжын омогорхол, найдал мүн.
Хизаарай ЗАГС-ын Департаментын Агын аймагай таһагай албатад хүүгэдэй мүндэлһые, залуушуулай гэр бүлэ болоһые хуулиин ёһоор дансада оруулдаг, мүн олон жэлдэ сугтаа ажаһуужа, ойн баяраа угтаһан зониие амаршалдаг ба бусад үүргэнүүдые дүүргэдэг гуримтай.
Үнгэрэгшэ 2023 ондо Агын аймагай ЗАГС-ын таһагта гэр бүлэнэрые амаршалгын хэмжээ ябуулганууд олон үнгэргэгдөө. Ага тосхоной ажаһуугшад Валерий Семёнович ба Нина Васильевна Елановтанай, Һүдэнтэ нютагай Сокто Лхасаранович ба Балма Чимитовна Тугдумовтанай сугтаа ажаһууһаар тэбхэр 50 жэлэй ойн баяр тэмдэглэгдээ. Тиихэдэ Ага тосхоной Баир Баторгуруевич ба Балжидма Баторовна Очировтан 35, Виктор Майкович ба Аяна Анатольевна Дармаевтан 30 жэл эбтэй эетэй ажаһууна. Залуу бүлэ Булад Цыденович ба Алла Валерьевна Батоболотовтоной гэр бүлэдэ эхир хүбүүд мүндэлһэн байна.
Июлиин 8-да, Гэр бүлын, инаг дуранай ба үнэн сэхэ байлгын үдэр Ага тосхоной Дашинима Раднабазарович Лудуповай ба Роза Жамбаловна Дашицыреновагай, Сергей Валерьевич ба Ольга Геннадьевна Пляскинтанай гэр бүлэнэр хүндэлэн ёһологдоо һэн.
Эрдэни ЧИМИТДОРЖИЕВ.
