- Буянто Балданжапович, хизаарай экономикын байдал хүл дээрээ найдамтай зогсоно гэжэ хэлэхээр, али шиидхэгдээгүй асуудалнууд бии гү?
- Һүүлшын табан жэлдэ хизаарай экономико тогтууритай байдалда оронхой. Хизаарай бюджедтэ һайн олзо оршо, налог татабари ороно. Хизаараймнай экономикын хүгжэлтын олон һалбаринуудай нэгэн ашагта малтамалнуудые олзоборилго, ой модо үйлэдбэрилгэ, хүдөө ажахы, түмэр буйлуулга г.м. болоно. Шулуун нүүрһэнэй, нефтиин, газай нөөсэ баян. Нютагай экономико хүгжөөхын тула түлэблэл үргэнөөр бэелүүлхэ шухала. Нэн түрүүн, ехэ барилга ябуулдаг, ашагта малтамалнуудые олзоборилдог инвесторнүүдые һонирхуулха хэрэгтэй. Тэдэнэй налогууд хизаарай бюджедтэ ороно. Экономико гүйсэд хүгжөөхэ талаар шиидхэгдээгүй олон асуудалнууд гарана. Хизаарай ажаһуугшад эдеэ хоолоор, нютагай үйлэдбэриин продукцинуудаар оройдоол 2-5 хуби тухай хангагдана. Энэ бага. Һүнэй зүйлнүүд, үндэгэн г.м. эдеэ хоол багаар, мяханай зүйлнүүдые муугаар үйлэдбэрилнэбди. Нооһо саашань үйлэдбэрилхэ асуудал шиидхэгдээдүй. Мяхан, нооһон нютагһаа гадуур гаргагдажа, саашаа наймаалагдана. Эдэ зүйлнүүдые нютагтаа үйлэдбэрилхэ хэрэгтэй. Үйлэдбэридэ мүнгэ һомолһон түлэблэлнүүдые бэелүүлжэ, олон хүниие ажал хүдэлмэритэй болгохо арга байна. Экономико хүгжөөхэ зуураа социальна асуудалнуудые шиидхэхэ аргатайбди.
- Эндэ һая «Россия 24» телеканалаар Шэтын сурбалжалагшадта интервью үгэхэдөө, хизаарта Wildberries компаниин таһаг бии болохонь гэжэ хэлэһэн байнат. Энээн тушаа тодорхойлжо үгыт.
- Wildberries компаниин таһаг складуудтайгаар Шэтэ хотодо байгуулагдахань. Тус компани ганса Үбэр Байгалай хизаарта бэшэ, харин бүхы Алас Дурнын нютагуудта хүдэлхэ. Хизаар руу ерүүлхын тула ехэ ажал ябуулагдаһан. Олон нютаг можонууд газар дээрээ Wildberries компани байгуулха дуратай. Компаниин Шэтэдэ байгуулагдахада, 10 мянга гаран хүн ажалай һууринуудаар хангагдаха, хизаарай бюджедтэ налог орохо юм.
- Үбэр Байгалай хизаар Хитад, Монгол гүрэнүүдтэй хилэжэдэг гээшэ ааб даа. Хүршэ гүрэнүүдтэй хоорондын экономикын харилсаан хэр зэргэ бэхижүүлэгдэнэб?
- Хизаар географиин талаар зохид газарта оршодог гээшэ. Хажуудамнай Хитад, Монгол байна. Россимнай эдэ гүрэнүүдтэй нүхэд ёһоной харилсаанда гэжэ тэмдэглэхээр. Худалдаа наймаагай нягта харилсаанһаа олон һалбаринууд, тэрэ тоодо экономикомнай хүгжэнэ. Гадаада эд бараа, ашагта малтамалнуудые, модо шулуунай нөөсэнүүдые худалдан гаргалга эдэбхижэнэ. Хари гүрэнһөө манай үйлэдбэридэ хэрэгтэй юумэеэ гарганабди. Эндэ түмэр харгын, авто-унаануудай ябалга, ашаа шэрэлгэ (логистика) хүгжөөхэ хэрэгтэй. Уласхоорондын авто-унаануудай гарадаг «МАПП Забайкальск» гэһэн пункт һэльбэн шэнэлэгдэхэ. 2025 он болотор энэ пункт һэльбэн шэнэлэгдэжэ, мүнөөнэй эрилтэдэ таарама объект болохоор хүлеэгдэнэ. Росси ба Монгол гүрэнүүдэй хоорондо хилэ гарадаг Дээдэ Ульхун, Староцурухатуй һууринууд шадархи пунктнууд һэльбэн шэнэлэгдэхэ бшуу.
Эрдэни ЧИМИТДОРЖИЕВ.
«Экономико хүгжөөхын тула түлэблэлнүүдые бэлдэхэ хэрэгтэй»
- Информация о материале
- Автор: SuperUser
- Категория: Ниигэм
- Просмотров: 591
