Митингнүүдээр эхилээ
   Майн 9-эй үдэр Ага тосхондо хэдэн хэмжээ ябуулга эмхидхэгдээ. Түрүүн баяр ёһололой митингнүүд болоо. «Агинский колхозник» танкын хүшөөгэй дэргэдэ үнгэргэгдэһэн «Вспомним всех поимённо» гэһэн митинг хүтэлэн ябуулагшад: «Агын тойрогой сэрэгэй комиссариадаар 5262 хүн Совет Армида татагдажа, арад зоной амгалан байдалай, Агуу Илалтын түлөө 2507 хүн дайн байлдаанай газарта ами наһантаяа хахасаһан, СССР-эй хамгаалгын жасада тойрогһоо 15 сая түхэриг оруулагдаһан, 12500 дулаан хубсаһан эльгээгдэһэн, 2 сая 516 мянган түхэригэй облигаци тушаагдаһан байна. 1943-1945 онуудта Улаан Армиин, дайнай газарта баатарай үхэлөөр алдалан унаһан сэрэгшэдэй бүлэнэрые дэмжэжэ, тойрогой ажалша арад 1450 толгой малаар, 4600 комплект хубсаһаар, эдеэ хоолоор хангаһан. Дайнда 18000 адууһан, 34000 гаран эбэртэ бодо мал, 170-аад мянган жэжэ бодо мал эльгээгдэһэн», - гээд мэдүүлбэ.
   Удаань Агын аймагай захиргаанай толгойлогшо Насак Бабужапов Агуу Илалтын һайндэрөөр амаршалаа: «Агын аймагһаа 2364 нютагайхиднай фронтдо мордожо, Сибириин, Забайкалиин дивизинүүдэй бүридэлдэ тон ехэ дайн байлдаануудта хабаадаһан, тэдэнэй 1118-иинь дайнай газарта алдалан унаһан байна. Дайнай ара талын ажалшад үнэн шударгыгаар ажаллажа, Агуу Илалта шэрээлсэһэн. Бидэ эб найрамдал, эрхэ сүлөө асарһан, дайнай һүүлээрхи хүндэ хүшэр сагуудта гүрэн түрэеэ бодхоолсоһон зондоо доро дохижо, баярые хүргэнэбди. Мүнөөдэр тогтоод байһан бэлэгүй байдалда энэ юртэмсын хэбэрэг байһые харанабди. Тиимэһээ бидэ булта сэрэгэй тусхай үйлэ хэрэгтэ хабаадажа, дайшалхы задачаяа дүүргэжэ ябаһан сэрэгшэдээ дэмжэхын тула нэгэдэжэ, илалтын түлөө бии шадалаараа оролдонобди. Бултандатнай энхэ элүүрые, амгалан байдал хүсэнэб».

You have no rights to post comments