Хоёр миллиард түхэригэй барилганууд
   Тойрогой дэбисхэртэ Россиин Юрэнхылэгшын субсидиин, үндэһэн түлэблэлнүүдэй, гүрэнэй программануудай шугамаар барилгын, заһабарилгын хү-дэлмэринүүд ябуулагдана. Гүрэнһөө хоёр миллиард түхэриг һомологдоһон юм. «Безопасные качественные дороги» гэһэн программаар тойрогой харгынууд заһабарилагдажа байна.

   Хаана ямар барилганууд хэгдэнэб?
   Байгша ондо ямар объектнүүдэй барилгын ажал ябуулагданаб гэжэ тодорхойлходо, Россиин Юрэнхылэгшын субсидиин программаар Амидхааша нютагта соёлой байшанда барилгын проектнэ-сметнэ данса зохёогдоно. Энэ барилгада гүрэнһөө 10 сая түхэриг һомологдонхой. Һая болотор ашаглагдажа байһан соёлой гуламта хуушаржа, мүнөөнэй эрилтэдэ хүрэнэгүй. Тайзан, хүгжэмэй хэрэгсэлнүүд, харагшадай танхим, һууринууд г.м. барандаа шэнэлэгдэхэ. Саарһа дансын бүтэхэдэ, барилгын ажал эхилхээр хараалагдана. Нижний-Новгород хотын «Архитектурно-строительное бюро «Парсек» гэһэн эмхи барилгын объект бодхоохо юм.
   Дулдаргада стадион һэльбэн шэнэдхэлгэдэ гүрэнһөө 22 сая түхэриг һомологдонхой. Стадион дээрэ волейбол, баскетбол, футбол наадаха, городки шэдэхэ талмайнууд һэльбэн шэнэлэгдээ. Футбол наадаха талмай шэнэ газоноор хушагдаа. Хүнгэн атледүүдэй гүйлдэхэ харгы резинэ хушалтатай болоо. Бэеэ һорихо тренажёрно хэрэгсэлнүүд тодхогдоо, түмэр хорёо баригдаа. Мүнөөдэрэй байдалаар, стадионой заһабарилга далан хуби тухай хэгдээд байна. Дулдаргын стадион Ага ба Могойто тосхонуудай стадион шэнги болохо юм.
   Могойтын аймагай Зугаалай нютагта тамирай байшан һэльбэн шэнэлэгдэнэ. «Сита Строй» эмхи байшанда һалхидуулха түхеэрэлтэнүүдыень (вентиляци) һэлгүүлнэ, түймэрһөө хамгаалгын, видео-буулгабариин хэрэгсэлнүүдые табина. Үмсын хэрэг эрхилэгшэд байшанай газаагуур болбосон түхэлтэй болгохо, хорёолхо хүдэлмэринүүдые ябуулна.
   Ага тосхоной Аэродромная гудамжаар аэровокзалай байшан бариха талаар ажал эхилхээр түсэблэгдэнэ. Тосхоной «АМСАТУ» эмхи байшанай модульно хушалта, хана хэхэ юм. Улаан-Үдэ хотын «Логисттранстрой» эмхи самолёт, вертолёдуудай бууха, ниидэхэ талмай бэлдэхэ уялгатай. Аэровокзалай ашаглалгада тушаагдахада, Агаһаа-Улаан-Үдэ хото самолёдоор ниидэхэ арга бии болохо гэжэ хэлэгдэнэ.
   Эрдэни ЧИМИТДОРЖИЕВ.

You have no rights to post comments