- Баир Батоевич, Агын лесничествын албанай ажал хэрэгүүд тушаа тодорхойгоор хөөрэжэ үгыт.
   - Манай ажахы Могойтын ба Агын аймагуудай дэбисхэр дээрэхи ой модо аршалан хамгаалха, тариха, тайраха г.м. хүдэлмэринүүдые хинан шалгаха талаар ажал ябуулдаг гээшэ. Агын аймагай лесничествэдэ Агын ба Аргалиин ойн ажахынууд ородог. Агын лесничествэ 285722 гектар газарта оршоно. Тэрэнэй 240 мянган гектар газар ой модон болодог, бэшэниинь нуга сабшаланууд, намаг, бэлшээри, поли г.м. Нютагнай элдэб янзын модоор баян: шэнэһэн, нарһан, хуһан, уляаһан ба бэшэшье модод ургадаг. Манай албанайхид Шэтэ хотодо гүрэнэй ойн ажахын хүтэлбэридөө тоосоо баридаг юм. Жэлэй хугасаада ойн ажахыда ямар һэлгэлтэнүүд болооб, хэды хуби модод тайрагдаа, таригдаа, шатаа, хорхой шумуулда эдюулээ бэ гэхэ мэтэшэлэн тоосоо хэдэг заншалтайбди.
   - Ойн ажахын албанда хэды хүн ажалладаг бэ, техникэ унаагаар хэр хангагданхайбта?
   - Манай албанда 25 хүн ажалладаг. Манда 4 участково леснигүүд дуталдана, ажалладаг зоноймнай оройдоол дүрбэниинь ойн ажахын мэргэжэлтэй. Ойн ажахыда хори, гуша гаран жэл хүдэлжэ байһан ветеранууд олон, залуушуулшье бии. Зарим тэдыень нэрлэбэл, ойн ажахын даргын орлогшоор Доржи Дугарон, леснигүүд Фёдор Черников, Шойроп Бороев (хоюулаа – Ага), Валерий Дансаранов (Ага-Хангил), Эрхэтэ Дугаров (Хойто-Ага), Владимир Генздилов (Курорт-Дарһан) ба бусад болоно. Ажалай «УАЗ», «Нива» түхэлэй унаануудтайбди.
   - Баир Батоевич, Та хэды жэл ойн ажахыда хүдэлжэ байнабта?
   - Уссурийск хотодо Примориин гүрэнэй хүдөө ажахын академиин ойн ажахын институдта һуража, «Инженер лесного хозяйства» мэргэжэлтэй боложо, 1999 ондо дүүргээд, Ага нютагаа бусажа, мүнөө болотор хүдэлнэб. Түрүүн ойн ажахын хүтэлбэридэ, һүүлдэ Дулдаргын аймагай ойн ажахыда ахамад лесничиин тушаалда хүдэлөө һэм. Ага тосхон ерэжэ, мэргэжэлтэнээр хүдэлжэ байтараа, Агын ойн ажахын даргаар томилогдоһон байнаб.
   - Ойн ажахын ажалтад ямар үүргэтэйб?
   - Гол шухалань гэхэдэ, ажаһуугшад, арендаторнууд ойн баялигуудые гүрэнэй хуулиин ёһоор хэр зүбөөр ашаглана гээшэб гэжэ шалгаха, хинаха үүргэтэй. Ой модо элдэб аюулнуудһаа һэргылхэ, аршалха, бүридхэлдэ абаха талаар гүрэнэй даабаринуудые дүүргэдэгбди. Жэл бүхэндэ түлэблэлнүүдые зохёожо, тэдэнээ бэелүүлхые оролдодогбди. Хаана харгы гаргахаб, хаана модо отолхоб, тарихаб г.м. сэдэбүүдээр түлэблэлнүүдые хамгаалдагбди. Ажаһуугшадта гэр гуламтадаа түлеэ бэлдэхыень манай албанай мэргэжэлтэд зүбшөөлтэй данса (лесобилет) хэжэ үгэдэг. Мүнөө ажаһуугшадай модо отолхо ажал дүүрэжэ байна. Иигэһээр түймэрэй аюулай хаһа эхилхэнь. Үнгэрэгшэ жэл мартын 25-да ой хаагаад байгаа һэмди. Байгша ондо хааха болзор болоодүй. Саһанай үшөө ороо һаа, ой соо модо отололгын ажал үргэлжэлүүлэгдэхэ.

You have no rights to post comments