НЭЭЛГЭДЭ
Үдэрэй 6 сагһаа стадиной талмай дээрэ нээлгын баяр ёһолол үргэнөөр эмхидхэгдээ. Баяр ёһололой жагсаалые мүрысөөнэй шүүгшэд ударидан ябаа. Агын Буряадай тойрогой Захиргаанай тамир хүгжөөлгын таһагай дарга Булат Бальжинимаев, Буряад Уласай ба Агын Бурядай автономито тойрогой физическэ культурын ба тамирай габьяата хүдэлмэрилэгшэ Баир Гомбоев гэгшэд жагсаал хүтэлбэрилөө.
«Зунай нааданай» 6 дахин илагшад болоһон Могойтын аймагайхид жагсаалда түрүүн гараа. Аймагай захиргаанай толгойлогшо Булат Нимбуев, аймагай зүблэлэй түрүүлэгшэ Александр Будаев жагсаалда ябаа. Мүн Алдар Солын орденой 2 удаа кавалер, Россиин Федерациин хүдөө ажахын габьяата хүдэлмэрилэгшэ Рабдан Цыбенов, Россиин физическэ культурын ба тамирай габьяата хүдэлмэрилэгшэд – Батор Доржинимаев, Валерий Содбоев, Дугаржап Жаргалов гэхэ мэтэ нютаг орондоо суутай хүнүүд ябалсаа. Бүхэроссиин үүлтэртэ хони ямаадай үзэсхэлэндэ аймагай түлөөлэгшэд 4 дахин шангай һуури эзэлһэн байна. Үзэсхэлэнэй илагшад, бүхэ барилдаагаар уласхоорондын классай тамирай мастернууд, армейскэ гар тулалдаагаар Европын абарга гэхэ мэтэ шамбай шадалтай тамиршад, барилдаашад, мүн бэшэшье олон хүн хабаадаа.
Агын аймагай һүлдэ (герб) волейболоор тамирай мастерта кандидат, оюутадай дунда Россиин абарга, Буряад Уласай 6 удаа абарга Тумэн Базаров баряад ябаа. Мүн хойноһоонь барилдаашад – Зандан Цыденов, Элбэкто Базаров, Бэлигто Лхамажапов, Тимур Ирдынеев, Арсен Цыбиков тугуудые баряад гараа. Агын аймагай захиргаанай толгойлогшо Насак Бабужапов ба муниципальна аймагай зүблэлэй түрүүлэгшэ Болот Аюров жагсаал дахуулаа. Олон жэл Агын аймагта аша үрэтэйгөөр хүдэлһэн хүндэтэ эрхэтэд, сэрэгэй тусхай үйлэ хэрэгтэ хабаадагша сэрэгшэд, аймагай хүдөө һуурингуудай захиргаануудай толгойлогшонор, тамиршад, Россиин хэмжээндэ эмхидхэгдэһэн үүлтэртэ хони ямаадай үзэсхэлэндэ хабаа-дагшад, «Баяр» хатарай ансамблиин хүмүүжэмэлнүүд, «Магтаал», «Түмэн Жаргалан» аман зохёолой бүлгэмүүдэй гэшүүд болон бусад жагсаалда алхалалдаа.
Дулдаргын аймагай захиргаанай толгойлогшо Аюша Мункуев, аймагай зүблэлэй түрүүлэгшэ Батор Доржиев гэгшэд аймагай жагсаал дахуулаа. Агын ба забайкалиин нарин нооһото үүлтэрэй хонид үрэжүүлэгдэдэг. Забайкалиин үүлтэрэй адуун бии. Жагсаалда аймагаа суурхуулһан бүхэ барилдаагаар тамирай мастер Максим Судаков, Александр Бродягин, һур харбалгаар арадай үндэһэн дүримөөр тамирай мастер Бүргэд Ринчинов, Амоголон Жундуев, һур харбалгаар уласхоорондын классай тамирай мастер Булат Дугаров гэхэ мэтэ хабаадаа.
Һүүлээрнь Ага тосхоной түлөөлэгшэд жагсаалда гараа. «Ага тосхон» хотын тойрогой захиргаанай толгойлогшо Андрей Дашин, Дүүмын түрүүлэгшэ Булат Бадмацыренов жагсаал хүтэлөө. Үбэр Байгалай хизаарай транспортын габьяата хүдэл-мэрилэгшэ Бато Шойдоков, Шэтын можын һуралсалай габьяата хүдэлмэрилэгшэ Анатолий Базаров, багшын ажалай ветеранууд, локальна дайнай ветеранууд, эмхинүүдэй захиралнууд, нэмэлтэ һуралсалай эмхинүүдэй түлөөлэгшэд, һоригшод гэхэ мэтэ ябаа.
Россиин, Үбэр Байгалай хизаарай, Агын Буряадай тойрогой, «Зунай нааданай» тугуудые үргэхэ эрхэ Могойтын аймагһаа Россиин абарга, бүхэ барилдаагаар Россиин тамирай мастер Базар Батоболотов, Л.Линховоиной нэрэмжэтэ хүүгэдэй уран урлалай һургуулиин захирал Марина Бальжинимаева, Агын аймагай тамирай габьяата мастер, Азиин абарга Арсалан Будажапов, Агын Буряадай автономито тойрогой соёлой габьяата хүдэлмэрилэгшэ Константин Митупов, Дулдаргын аймагһаа Россиин абарга Игорь Максимов, Үбэр Байгалай хизаарай соёлой габьяата хүдэлмэрилэгшэ Саяна Дориева, столой теннисээр Алас Дурнын федеральна тойрогой мүрысөөндэ хүрэл медальда хүртэгшэ Номин Бальжинимаева, Үбэр Байгалай хизаарай соёлой габьяата хүдэлмэрилэгшэ Ирина Летяева гэгшэдтэ олгогдоо. Минутын туршада абяагүй байлга соносхогдоо. Удаань Агын Буряадай тойрогой Захиргаанай хүтэлбэрилэгшэ Базар Дугаржаповта үгэ үгтөө: «Эртэ урда сагһаа хүгжэн ерэһэн заншалта болоһон «Зунай наада» хүлеэгээбди. Эдэ үдэрнүүдтэ тойрогой тамиршад, соёлшод үндэһэн тамираараа, соёл урлалаараа хаба шадалаа үзэлсэн мүрысэхэ. Мүнөө бэлэгүй саг ерээд байна. Тиимэһээ хэдэн яһатаниие «Зунай наадан» нэгэдүүлнэ. Тусхай үйлэ хэрэгтэ сэрэгшэднай Эсэгэ ороноо эрэлхэгээр хамгаална. Тэдэнэртэ дэмжэлтэ боложо, нютаг бүхэндэ туһаламжын ажалнууд эрхилэгдэнэ. Тойрогой арад зондо үнэн зүрхэнһөө баясанаб. Малай үбэлжэлгэ гарза хоролтогүйгөөр үнгэрөө. Түл абалга 102 хубяар үрэжэлтэй байгаа. «Агростартап» грантын туһаламжада нютагай 20 хүн хүртөө. Тойрогой хүдөө ажахынууд 11000 гектар газар хахалжа, орооһо ба малай тэжээл таряа. Энэ жэл Юрэнхылэгшын субсидиин дүнгэлтөөр, үндэһэн түлэблэлөөр ба федеральна программаар тойрогой дэбисхэртэ 1 тэрбүм 700 сая түхэриг һомологдоо. Энэ болбол харгы заһабарилгада, социальна объектнүүдэй барилгын ба заһабарилгын ажалнуудта гэхэ мэтэ гаргашалагдаха юм».
Удаань тойрог дотороо ажал хэжэ, горитойхон хубитаяа оруулдаг, олондо жэшээ болодог шударгы бэрхэ хүдэлмэрилэгшэдтэ шангууд барюулагдаа.
Эртэ урда сагһаа буряад арад эрын гурбан наадаар мүрысэдэг байһан. Эрын гурбан наадан тухай зүжэглэмэл наадан дурадхагдаа.
Дэлгэрэнгыгээр «Толон» һониной 27-дохи дугаарта уншагты.
